سعودی عرب نے بھی آئل ٹینکرز کو نشانہ بنانے کا الزام ایران پر عائد کر دیا

سعودی عرب نے آبنائے ہرمز میں اپنے آئل ٹینکر کو نشانہ بنانے کا ذمہ دار براہِ راست ایران کو ٹھہراتے ہوئے اس مجرمانہ اقدام کی شدید الفاظ میں مذمت کی ہے۔

سعودی وزارتِ خارجہ کی جانب سے جاری کردہ ایک باضابطہ بیان میں کہا گیا ہے کہ ایران فوری طور پر ایسی تمام اشتعال انگیز کارروائیاں اور اقدامات بند کرے جو بین الاقوامی بحری جہاز رانی، تجارتی راستوں کے امن اور عالمی توانائی کی ترسیل کے لیے سنگین خطرہ بن رہے ہیں۔

بیان میں سعودی حکام نے مزید واضح کیا کہ مملکت خطے میں اہم سمندری راستوں کے تحفظ اور عالمی منڈیوں کو تیل کی بلا تعطل فراہمی یقینی بنانے کے لیے پرعزم ہے۔ اس مقصد کے لیے سعودی عرب عالمی برادری اور اپنے بین الاقوامی اتحادیوں کے ساتھ مل کر کام جاری رکھے گا۔

آبنائے ہرمز میں سعودی ٹینکر کو نشانہ بنائے جانے کے بعد خطے میں پہلے سے موجود شدید کشیدگی اور سفارتی تناؤ میں مزید اضافے کا خدشہ ظاہر کیا جا رہا ہے۔