190 ملین پاؤنڈ کیس: عمران خان اور اہلیہ کے وکلا کو دلائل کیلئے آخری مہلت

اسلام آباد ہائی کورٹ نے 190 ملین پاؤنڈ کیس میں بانی پی ٹی آئی اور بشریٰ بی بی کی اپیلوں پر سماعت کا تحریری حکم نامہ جاری کر دیا ہے۔ چیف جسٹس سردار محمد سرفراز ڈوگر اور جسٹس محمد آصف پر مشتمل دو رکنی بینچ کی جانب سے جاری کردہ حکم نامے میں ملزمان کے وکلاء کو دلائل پیش کرنے کے لیے آخری اور حتمی مہلت دی گئی ہے۔ عدالت نے واضح کیا ہے کہ اگر آئندہ سماعت پر اپیلوں کے حق میں دلائل پیش نہ کیے گئے تو کیس کو مزید ملتوی نہیں کیا جائے گا، بلکہ قومی احتساب بیورو (نیب) کا مؤقف سننے کے بعد دستیاب ریکارڈ کی بنیاد پر ہی اپیلوں کا فیصلہ کر دیا جائے گا۔ تحریری حکم نامے کے مطابق، وکیلِ صفائی سردار لطیف کھوسہ نے عدالت کو باقاعدہ انڈر ٹیکنگ دی ہے کہ وہ آئندہ سماعت پر مزید التواء کی درخواست نہیں کریں گے اور اپنے دلائل مکمل کریں گے، جس پر عدالت نے کیس ملتوی کرنے کی استدعا منظور کی۔