اسرائیل نے مجھے مارنے کیلئے قید کیا، لگتا نہیں زندہ بچ سکوں: فلسطینی ڈاکٹر حسام ابو صفیہ

غزہ میں جاری جنگ کے دوران بدترین حالات اور مسلسل بمباری کے باوجود سیکڑوں زخمیوں اور مریضوں کی جانیں بچانے والے معروف فلسطینی معالج ڈاکٹر حسام ابو صفیہ کی زندگی شدید خطرے میں پڑ گئی ہے۔ اسرائیلی حراست میں موجود ڈاکٹر حسام نے اپنے ایک پیغام میں خدشہ ظاہر کیا ہے کہ “وہ مجھے مارنے کے لیے یہاں لائے ہیں، مجھے نہیں لگتا کہ میں یہاں سے زندہ بچ سکوں گا، یہی میرا آخری وقت ہے”۔

بین الاقوامی رپورٹس کے مطابق، اسرائیلی حکام نے ڈاکٹر حسام ابو صفیہ کو اب تک کسی بھی باضابطہ فردِ جرم کے تحت نہ تو کسی عدالت میں پیش کیا ہے اور نہ ہی ان پر کوئی قانونی مقدمہ چلایا گیا ہے۔ اطلاعات ہیں کہ انہیں کسی نامعلوم مقام پر واقع ایک زیرِ زمین انتہائی سخت سکیورٹی والی بدنام زمانہ جیل میں منتقل کر دیا گیا ہے، جہاں قیدیوں پر شدید تشدد کے واقعات عام ہیں۔

ڈاکٹر حسام ابو صفیہ کے اس پیغام کے منظرِ عام پر آنے کے بعد عالمی انسانی حقوق کی تنظیموں اور ان کے قانونی وکیل نے ان کی جان کو لاحق شدید خطرات پر گہری تشویش کا اظہار کیا ہے۔ انسانی حقوق کے اداروں نے عالمی برادری اور بین الاقوامی طبی تنظیموں سے اپیل کی ہے کہ وہ اسرائیلی قید میں موجود فلسطینی طبی عملے پر ہونے والے مظالم کا نوٹس لیں اور ڈاکٹر ابو صفیہ کے فوری تحفظ اور غیر مشروط رہائی کے لیے فوری اقدامات کریں۔