راولپنڈی: دکان مالک نے 3 سو روپے کے تنازع پر سابق ملازم کو قتل کردیا

راولپنڈی میں معمولی رقم کے تنازع پر اپنوں کے ہاتھوں اپنوں کے قتل کا ایک انتہائی افسوسناک واقعہ پیش آیا ہے، جہاں چکن شاپ کے مالک نے محض 300 روپے کی دیہاڑی مانگنے پر اپنے سابق ملازم کو چھریوں کے وار کر کے موت کے گھاٹ اتار دیا۔

پولیس حکام کے مطابق، مقتول حیدر اور ملزم عمیر آپس میں قریبی کزن تھے۔ حیدر اپنے کزن عمیر کی چکن شاپ پر کام کرتا تھا، جسے عمیر نے دو دن قبل کسی بات پر کام سے نکال دیا تھا۔ مقتول حیدر نے جب دکان کے مالک عمیر سے اپنی محنت مزدوری کے بقایا 300 روپے کا تقاضا کیا، تو اس بات پر دونوں کے درمیان تلخ کلامی ہو گئی جو دیکھتے ہی دیکھتے شدید جھگڑے میں تبدیل ہو گئی۔

طیش میں آ کر دکان مالک عمیر نے دکان میں موجود مرغی ذبح کرنے والی چھری اٹھائی اور حیدر پر پے در پے وار کر دیے۔ چھریوں کے گہرے زخم لگنے کے باعث حیدر موقع پر ہی خون میں لت پت ہو کر دم توڑ گیا، جبکہ ملزم واردات کے بعد باآسانی فرار ہونے میں کامیاب ہو گیا۔

واقعے کی اطلاع ملتے ہی پولیس کی نفری موقع پر پہنچ گئی اور مقتول کی لاش کو پوسٹ مارٹم کے لیے ہسپتال منتقل کیا۔ پولیس نے واقعے کا مقدمہ درج کر کے مفرور ملزم عمیر کی گرفتاری کے لیے دو خصوصی ٹیمیں تشکیل دے دی ہیں اور حکام کا دعویٰ ہے کہ ملزم کو جلد ہی حراست میں لے لیا جائے گا۔