ڈیڑھ ماہ سے لاپتہ شخص کی مدفون لاش گھر کے باتھ روم سے برآمد

بھارتی ریاست اتر پردیش کے شہر آگرہ میں ایک سنسنی خیز اور لرزہ خیز سنگین جرم کا انکشاف ہوا ہے جہاں ایک خاتون نے مبینہ طور پر اپنے شوہر کو بے ہوش کرنے کے بعد قتل کیا اور اس کی لاش گھر کے باتھ روم کے فرش کے نیچے دفن کر دی۔

غیر ملکی میڈیا رپورٹ کے مطابق، مقتول سریندر شرما تقریباً ڈیڑھ ماہ سے لاپتا تھا اور اس کی بیوی روبی شرما نے 45 روز تک شوہر کی گمشدگی کا ڈراما رچا کر پولیس اور اہلخانہ کو گمراہ کیے رکھا۔ تاہم، پولیس نے شک ہونے پر جب گہرائی سے تفتیش کی تو باتھ روم کا فرش توڑ کر مقتول کی لاش برآمد کر لی۔

پولیس حکام کا کہنا ہے کہ ملزمہ روبی شرما نے اعترافِ جرم کرتے ہوئے بتایا کہ اس نے اپنے شوہر کے کھانے میں 15 سے 20 نیند کی گولیاں ملا دیں، اور جب وہ گہری نیند میں چلا گیا تو اسے بیدردی سے قتل کر دیا۔ قتل کے بعد لاش کو باتھ روم میں گھسیٹ کر لے جایا گیا جہاں اس وقت کچا فرش تھا۔ ملزمہ نے وہاں لاش کو دفن کیا اور بعد میں مزدوروں سے مٹی ڈلوائی، پھر چند ہی دنوں میں مستری بلا کر اس جگہ پر کنکریٹ کا پکا فرش بنوا دیا تاکہ کسی کو بو یا لاش کی موجودگی کا شبہ نہ ہو۔

رپورٹ کے مطابق، روبی شرما نے 26 مئی کو اپنے دیور انیل کے ساتھ مل کر شوہر کی گمشدگی کی رپورٹ درج کرائی تھی اور مؤقف اپنایا تھا کہ سریندر 18 مئی کو گھر سے نکلا اور واپس نہیں آیا۔ ابتدائی دنوں میں وہ خود بھی شوہر کی تلاش کا ڈھونگ رچاتی رہی اور اہل محلہ کے سامنے روتی دھوتی رہی، لیکن پولیس کو اس کے بیانات میں تضادات ملنے پر شک گزرا۔ دورانِ تفتیش ملزمہ نے بتایا کہ شوہر کے ایک خاندانی جھگڑے کے بعد اسے قانونی مشکلات کا شدید خوف تھا، جس کی وجہ سے اس نے یہ ہولناک قدم اٹھایا۔ پولیس نے ملزمہ کو گرفتار کر کے مزید قانونی کارروائی شروع کر دی ہے۔