اسرائیل کو خطے کو دوبارہ جنگ کی آگ میں دھکیلنے کی اجازت نہیں دی جا سکتی: صدر اردوان

ترکیہ کے صدر رجب طیب اردوان نے دوٹوک الفاظ میں کہا ہے کہ جنگ کی عادی اسرائیلی حکومت کو ہرگز یہ اجازت نہیں دی جانی چاہیے کہ وہ ایک بار پھر پورے خطے کو بارود، تباہی اور خون کی بو میں جھونک دے۔

ترکیہ کے صدارتی دفتر کی جانب سے جاری کردہ بیان کے مطابق، صدر رجب طیب اردوان نے خطے میں جاری کشیدگی کو کم کرنے کے لیے ترکیہ کی سفارتی کوششوں اور اقدامات کی حمایت جاری رکھنے کے پختہ عزم کا اظہار کیا ہے۔

ترک صدر نے ایک اہم بین الاقوامی پیش رفت کا ذکر کرتے ہوئے کہا کہ ایران اور امریکہ کے درمیان ‘اسلام آباد مفاہمتی یادداشت’ کے بعد دنیا نے سکھ کا سانس لیا ہے۔ انہوں نے امید ظاہر کی کہ اس مثبت پیش رفت سے خطے میں طویل عرصے سے جاری کشیدگی کو کم کرنے میں مدد ملے گی۔

رجب طیب اردوان نے واضح کیا کہ ترکیہ کی حکومت اسرائیل کے تمام اشتعال انگیز اقدامات پر گہری نظر رکھے ہوئے ہے۔ انہوں نے عالمی برادری پر زور دیا کہ وہ اسرائیلی جارحیت کو روکنے کے لیے اپنا کردار ادا کرے تاکہ مشرقِ وسطیٰ کو ایک نئی اور ہولناک جنگ سے بچایا جا سکے۔