کابل یونیورسٹی میں دھماکا ، 20 طلبہ زخمی

افغانستان کے دارالحکومت کابل میں واقع کابل یونیورسٹی کے طلبہ ہاسٹل میں جمعہ کی شب ہونے والے ایک دھماکے کے نتیجے میں کم از کم 20 طلبہ زخمی ہو گئے۔

مقامی ذرائع کے مطابق، یہ واقعہ اس وقت پیش آیا جب طلبہ رات کے کھانے کے لیے ڈائننگ ہال کی طرف جا رہے تھے۔ دھماکے کے فوری بعد ریسکیو ٹیموں نے کارروائی کرتے ہوئے تمام زخمیوں کو علی آباد اسپتال منتقل کیا، جہاں طبی ذرائع کا کہنا ہے کہ تمام زخمی طلبہ کی حالت خطرے سے باہر ہے۔

دھماکے کے فوراً بعد سوشل میڈیا پر وائرل ہونے والی ویڈیوز میں متعدد ایمبولینسوں کو کابل یونیورسٹی ہاسٹل کے باہر دیکھا جا سکتا ہے، جہاں امدادی کارکن زخمیوں کو نکالنے اور انہیں ابتدائی طبی امداد فراہم کرنے میں مصروف رہے۔ ہاسٹل میں موجود ایک طالب علم نے اپنے آڈیو پیغام میں بتایا کہ واقعے کے فوراً بعد پورے ہاسٹل کی سکیورٹی کو انتہائی سخت کر دیا گیا ہے اور طلبہ کی نقل و حرکت کو مکمل طور پر محدود کر دیا گیا ہے۔ دھماکے کی اصل نوعیت ابھی تک معلوم نہیں ہو سکی ہے اور نہ ہی کسی گروپ کی طرف سے اس کی ذمہ داری قبول کی گئی ہے۔ طالبان حکومت کی جانب سے بھی تاحال اس دھماکے کی وجوہات، نوعیت یا ممکنہ ذمہ داروں کے بارے میں کوئی باضابطہ بیان جاری نہیں کیا گیا، جس کے باعث واقعے کے حوالے سے مختلف قیاس آرائیاں کی جا رہی ہیں۔