اسرائیلی انٹیلیجنس نے ایرانی جوہری پروگرام پر نیتن یاہو کے دعوے کو مسترد کر دیا

اسرائیلی میڈیا نے سنسنی خیز دعویٰ کیا ہے کہ وزیراعظم بنجمن نیتن یاہو کو اپنے ہی ملک کے انٹیلی جنس اداروں کی جانب سے اس وقت شدید سبکی اور ہزیمت کا سامنا کرنا پڑا جب انہوں نے ایران کے جوہری پروگرام کی مکمل تباہی کے حکومتی دعوے کی توثیق کرنے سے صاف انکار کر دیا۔

رپورٹس کے مطابق وزیراعظم آفس (PMO) نے خفیہ ایجنسی ‘موساد’ اور اسرائیلی ملٹری انٹیلی جنس (امان) سمیت تمام متعلقہ سکیورٹی اداروں پر شدید دباؤ ڈالا کہ وہ ایران کے جوہری پروگرام کی مکمل تباہی سے متعلق سرکاری مؤقف کی عوامی سطح پر حمایت اور تصدیق کریں۔ تاہم، انٹیلی جنس حکام نے پیشہ ورانہ اصولوں کا حوالہ دیتے ہوئے ایسی کسی بھی غیر مصدقہ رپورٹ کی توثیق کرنے سے انکار کر دیا۔ اسرائیلی جریدے کا کہنا ہے کہ انٹیلی جنس حکام نے نیتن یاہو کے دعوے کو دستیاب شواہد سے مطابقت نہ رکھنے والا اور غیر پائیدار قرار دیا ہے، جس کے باعث وزیراعظم آفس، موساد اور ملٹری انٹیلی جنس کے درمیان شدید اختلافات اور تناؤ پیدا ہوگیا ہے۔

غیر ملکی میڈیا کے مطابق، وزیراعظم نیتن یاہو دراصل امریکی صدر ڈونلڈ ٹرمپ کے اس دعوے کی بھی توثیق چاہتے تھے جس میں کہا گیا تھا کہ ایرانی جوہری پروگرام مکمل طور پر تباہ ہو چکا ہے، لیکن اسرائیلی سکیورٹی اداروں نے اس مؤقف کی تصدیق سے سخت گریز کیا۔ رپورٹ میں واضح کیا گیا ہے کہ ایرانی جوہری پروگرام کی مکمل تباہی کا دعویٰ سب سے پہلے صدر ٹرمپ نے کیا تھا، مگر اسرائیلی اخبار کے مطابق اس دعوے کی تائید کے لیے تاحال کوئی ٹھوس شواہد سامنے نہیں آئے ہیں، اور حال ہی میں ہونے والی جنگ کے نتیجے میں ہونے والے نقصانات کے حتمی، مستند اور درست اعداد و شمار بھی ابھی تک دستیاب نہیں ہیں۔