پنجاب کائٹ فلائینگ آرڈیننس 2025 جاری، پتنگ بازی ڈپٹی کمشنر کی اجازت سے مشروط

لاہور: پنجاب حکومت نے پنجاب کائٹ فلائینگ آرڈیننس 2025 جاری کر دیا ہے، جس کے تحت پتنگ بازی کو ڈپٹی کمشنر کی اجازت سے مشروط کر دیا گیا ہے۔
پنجاب میں پتنگ بنانے اور فروخت کرنے کے لیے رجسٹریشن لازمی قرار دی گئی ہے، جبکہ پتنگ باز تنظیموں کو بھی رجسٹریشن کروانی ہوگی۔ رجسٹریشن کے بعد ہی پتنگیں بنانے اور فروخت کرنے کا لائسنس حاصل ہوگا۔

آرڈیننس کے تحت 2001 کا پتنگ بازی پابندی آرڈیننس مکمل طور پر منسوخ کر دیا گیا ہے اور سابقہ اقدامات کو درست قرار دیا گیا ہے۔
حکومت اور ڈپٹی کمشنر کو اختیار دیا گیا ہے کہ وہ مخصوص مقامات، دنوں اور مقررہ وقت پر محدود پیمانے پر غیر خطرناک مواد کے ساتھ پتنگ بازی کی اجازت دے سکیں، البتہ غیر خطرناک مواد کی تشریح آرڈیننس میں موجود نہیں ہے۔

آرڈیننس کے مطابق پولیس کو وسیع اختیارات حاصل ہوں گے، جس میں سب انسپکٹر رینک کا پولیس افسر بغیر وارنٹ گرفتاری کر سکے گا، کسی بھی مقام پر داخل ہو کر تلاشی لے سکے گا اور ممنوعہ سامان قبضے میں لے سکے گا۔
حکومت ضرورت پڑنے پر کسی بھی ادارے یا ایجنسی کو یہی اختیارات تفویض کرنے کا اختیار رکھتی ہے۔