اسلام آباد میں المناک حادثہ: آئی ایچ سی جج کے بیٹے کا جسمانی ریمانڈ منظور

اسلام آباد میں دل خراش ٹریفک حادثے میں دو نوجوان خواتین کی ہلاکت کے بعد اسلام آباد ہائیکورٹ کے جج جسٹس محمد آصف کے بیٹے کو جسمانی ریمانڈ پر پولیس کے حوالے کردیا گیا۔ پولیس کی درخواست پر جوڈیشل مجسٹریٹ شاہستہ خان کنڈی نے ریمانڈ کا حکم جاری کیا۔

پیر کی رات پیش آنے والا یہ حادثہ پاکستان نیشنل کونسل آف آرٹس (پی این سی اے) کے قریب اس وقت ہوا جب ایک کالا ایس یو وی اس اسکوٹی سے ٹکرا گئی جس پر دو لڑکیاں سوار تھیں۔ دونوں موقع پر ہی دم توڑ گئیں جبکہ گاڑی ٹکر کے فوراً بعد فرار ہوگئی۔

پولیس کے مطابق گاڑی کے نمبر اور نشانات کی مدد سے ملزم کا سراغ لگایا گیا اور اسے ایک نجی اسپتال سے حراست میں لیا گیا جہاں وہ علاج کے لیے آیا تھا۔ ملزم سے میڈیکل اور فرانزک نمونے حاصل کرلیے گئے ہیں جبکہ گاڑی کو ضبط کرکے فرانزک معائنے کے لیے بھجوا دیا گیا ہے۔

کیس میں پاکستان پینل کوڈ کی دفعات 279 (لاپرواہ ڈرائیونگ)، 322 (قتلِ خطا) اور 427 (املاک کو نقصان) شامل کی گئی ہیں۔
تفتیشی افسر نے عدالت کو بتایا کہ میڈیکل رپورٹ کی تصدیق، گاڑی کے ٹیکنیکل جائزے اور عینی شاہدین کے بیانات کیلئے مزید ریمانڈ درکار ہے، جس پر عدالت نے پولیس کی استدعا منظور کرلی۔

پولیس کا کہنا ہے کہ واقعے کی شفاف تفتیش کے لیے سی سی ٹی وی فوٹیجز حاصل کی جا رہی ہیں جبکہ متاثرہ خاندانوں کو یقین دہانی کرائی گئی ہے کہ کیس مکمل میرٹ پر نمٹایا جائے گا۔