شہید رہبرِ اعلیٰ کا آخری دیدار! تہران میں گرینڈ مصلیٰ کے دروازے عوام کے لیے کھول دیے گئے

ایران کے شہید سپریم لیڈر آیت اللہ سید علی خامنہ ای کی آخری رسومات اور الوداعی مراسم کا تہران میں باقاعدہ آغاز ہو گیا ہے۔ شہید رہبرِ اعلیٰ اور ان کے اہل خانہ کے اجسادِ خاکی آخری دیدار کے لیے تہران کے ‘مصلیٰ امام خمینی کمپلیکس’ (گرینڈ مصلیٰ) میں رکھ دیے گئے ہیں، جہاں اپنے قائد کو الوداع کہنے کے لیے لاکھوں سوگواروں کا سمندر امڈ آیا ہے اور تہران کی سڑکیں امریکہ مخالف اور انتقام کے نعروں سے گونج اٹھی ہیں۔

گرینڈ مصلیٰ کے دروازے عوام کے لیے کھول دیے گئے ہیں جہاں شدید غم و اندوہ کی حالت میں لوگ آخری دیدار کر رہے ہیں۔ عوام کل رات 8 بجے تک شہید رہبر کا آخری دیدار کر سکیں گے۔ گزشتہ روز ہونے والی تعزیتی تقریب میں دنیا بھر کے قائدین اور وفود نے شرکت کر کے شہید خامنہ ای کو خراجِ عقیدت پیش کیا۔ ان تعزیتی اجتماعات میں پاکستان، ترکیہ، قطر اور سعودی عرب سمیت دنیا بھر کے 100 سے زائد ممالک کے مہمان، اعلیٰ شخصیات اور حزب اللہ کے شہید رہنماؤں کے ورثاء بھی خصوصی طور پر شریک ہیں۔

ایرانی حکام کی جانب سے شہید سپریم لیڈر کے آخری سفر اور تدفین کا تفصیلی و باقاعدہ شیڈول جاری کر دیا گیا ہے،  پانچ جولائی کو  تہران میں مرکزی نمازِ جنازہ کا سب سے بڑا اجتماع صبح کے وقت منعقد کیا جائے گا۔ چھ جولائی کو  تہران میں مقامی وقت کے مطابق صبح 6:00 بجے جنازے کا باقاعدہ الوداعی جلوس شروع ہوگا۔  سات جولائی کو جنازے کا جلوس تہران سے ایران کے مقدّس شہر قُم منتقل کیا جائے گا۔  آٹھ جولائی  کو تدفین سے قبل جسدِ خاکی کو عراق کے مقدس شہروں نجف اور کربلا لے جایا جائے گا، جہاں عراق کے عوام جنازے کے جلوس نکالیں گے۔  ۹ جولائی کو  آیت اللہ سید علی خامنہ ای کو ان کے آبائی شہر مشہدِ مقدس میں سپردِ خاک کیا جائے گا۔

ایران میں اس وقت شدید ترین قومی سوگ کا سماں ہے اور دنیا بھر سے آنے والے لاکھوں زائرین اور غیر ملکی وفود کی سہولت اور سکیورٹی کے لیے تمام انتظامی انتظامات کو انتہائی حتمی اور فول پروف شکل دے دی گئی ہے۔