امریکا کیخلاف جدوجہد میں ایرانی قوم فاتح بن کر ابھرےگی: سربراہ روسی سلامتی کونسل

روس کی سلامتی کونسل کے سربراہ اور سابق صدر دیمتری میدودیف نے ایران کے سپریم لیڈر آیت اللہ سید علی حسینی خامنہ ای کی آخری رسومات کے موقع پر ایرانی قوم کے ساتھ یکجہتی کا اظہار کرتے ہوئے کہا ہے کہ امریکا کے خلاف جاری جدوجہد میں بالآخر ایرانی قوم ہی فاتح بن کر ابھرے گی۔

دیمتری میدودیف اس وقت ایک اعلیٰ سطح کے روسی وفد کی قیادت کر رہے ہیں جو شہید سپریم لیڈر کی تدفین اور تعزیتی تقاریب میں شرکت کے لیے تہران میں موجود ہے۔ تعزیتی تقریب میں شرکت کے بعد اپنے ایک خصوصی پیغام میں روسی رہنما نے کہا کہ آیت اللہ خامنہ ای کی رحلت پر روس بھی ایرانی قوم کے دکھ میں برابر کا شریک ہے۔ انہوں نے کہا کہ اس عظیم نقصان کے دکھ نے ایرانی قوم کو پہلے سے کہیں زیادہ متحد کر دیا ہے اور یہ قوم اب امریکا یا کسی بھی دوسرے بیرونی ملک کے دباؤ میں ہرگز نہیں آئے گی۔

تہران کے اس اہم دورے کے دوران روسی وفد نے ایران کے نو منتخب صدر مسعود پزشکیان سے بھی ایک تفصیلی ملاقات کی۔ اس موقع پر ایرانی صدر مسعود پزشکیان نے تہران اور ماسکو کے درمیان دیرینہ اسٹریٹیجک تعلقات کو مزید مضبوط بنانے کے عزم کا اعادہ کیا۔ انہوں نے دونوں ممالک کے مابین طے پانے والے معاہدوں پر عملدرآمد کی رفتار تیز کرنے پر زور دیتے ہوئے کہا کہ خاص طور پر معاشی، تجارتی، توانائی اور ٹرانزٹ (شراکت داری) کے شعبوں میں کیے گئے فیصلوں پر فوری اور تیزی سے عمل ہونا چاہیے تاکہ خطے میں دونوں ممالک کے مفادات کا تحفظ یقینی بنایا جا سکے۔