برطانیہ اور فرانس نے آبنائے ہرمز کو عالمی معیشت کی ’’اہم شہ رگ‘‘ قرار دیدیا

برطانیہ کے وزیرِاعظم کیئر اسٹارمر اور فرانس کے صدر ایمانوئل میکرون نے آبنائے ہرمز کی کشیدہ صورتحال پر ایک اہم مشترکہ بیان جاری کرتے ہوئے اسے عالمی معیشت کے لیے انتہائی “اہم شہ رگ” قرار دیا ہے۔

مشترکہ بیان میں دونوں عالمی رہنماؤں نے اس بات پر زور دیا کہ آبنائے ہرمز کے راستے تمام ممالک کے تجارتی و بحری جہازوں کی محفوظ اور بلاتعطل آمدورفت کی بحالی عالمی برادری کے لیے کلیدی اہمیت کی حامل ہے۔ انہوں نے واضح کیا کہ اس اہم بحری گزرگاہ میں کسی بھی قسم کی رکاوٹ عالمی تجارتی نظام کو متاثر کر سکتی ہے۔

بیان میں انکشاف کیا گیا ہے کہ خلیجی ملک عمان نے برطانیہ اور فرانس کے ساتھ مشترکہ اقدامات پر اتفاق کیا ہے، تاکہ عمان کے خودمختار علاقائی پانیوں میں بین الاقوامی جہاز رانی کی سلامتی کو ہر ممکن طور پر یقینی بنایا جا سکے۔

برطانوی اور فرانسیسی قیادت نے خطے میں امن و استحکام، تمام ریاستوں کی خودمختاری کے احترام، آزادیِ جہاز رانی اور بین الاقوامی قوانین کے فروغ کے لیے اپنے دیگر اتحادیوں اور شراکت داروں کے ساتھ مل کر قریبی تعاون جاری رکھنے کے پختہ عزم کا اعادہ بھی کیا ہے۔