پی ٹی آئی کا صوابی انٹرچینج دھرنا ختم، 7 دسمبر کو پشاور پاور شو کا اعلان

پاکستان تحریک انصاف نے صوابی انٹرچینج پر احتجاجی دھرنا ختم کرتے ہوئے 7 دسمبر کو پشاور میں عوامی قوت کا مظاہرہ کرنے کا اعلان کردیا۔

پی ٹی آئی کارکنان پارٹی ہدایت پر صوابی انٹرچینج پہنچے جہاں انہوں نے موٹروے کو دونوں اطراف سے بند کر کے احتجاج کیا۔ ریسٹ ایریا کے مقام پر ٹائر نذرِ آتش کیے گئے، جبکہ بندش کے باعث موٹروے پر گاڑیوں کی طویل قطاریں لگ گئیں۔ ایمبولینسیں پھنسنے سے مریضوں کو بھی شدید مشکلات کا سامنا کرنا پڑا۔

احتجاج میں پی ٹی آئی رہنما احمد خان نیازی بھی شریک ہوئے۔ خطاب میں انہوں نے کہا کہ بانی پی ٹی آئی سے ملاقاتوں پر ایک ماہ سے عائد پابندی خلافِ قانون ہے، اور اسی پابندی کے خلاف احتجاج کیا جارہا ہے۔ ان کے مطابق آج کے احتجاج کے بعد بانی پی ٹی آئی کو بہن سے ملاقات کی اجازت ملی ہے۔

بعد ازاں پی ٹی آئی قیادت نے دھرنا ختم کرنے کا اعلان کیا، جس کے بعد کارکنان منتشر ہوگئے اور موٹروے کھول دیا گیا۔
احمد خان نیازی نے کہا کہ اب پارٹی 7 دسمبر کو پشاور میں پاور شو کے ذریعے عوامی قوت کا بھرپور اظہار کرے گی۔