جنگ بندی اور امریکی دباؤ کام نہ آیا، غزہ میں اسرائیلی حملے جاری

بین الاقوامی برادری کے بڑھتے ہوئے دباؤ اور مبینہ جنگ بندی کے معاہدوں کے باوجود، اسرائیلی فورسز کی جانب سے مظلوم فلسطینیوں پر وحشیانہ حملوں کا سلسلہ تھم نہ سکا۔ گزشتہ 24 گھنٹوں کے دوران غزہ کے مختلف علاقوں پر کیے گئے فضائی اور ڈرون حملوں میں مزید 4 فلسطینی جامِ شہادت نوش کر گئے جبکہ 15 افراد شدید زخمی ہوئے ہیں۔

عرب میڈیا کے مطابق، اسرائیلی فوج نے جنوبی غزہ کی پٹی اور خان یونس کے علاقوں میں عام شہریوں کی گاڑیوں کو نشانہ بناتے ہوئے خطرناک ڈرون حملے کیے۔ ہسپتال حکام اور طبی ذرائع نے تصدیق کی ہے کہ خان یونس میں ہونے والی اس تازہ بمباری کے نتیجے میں 2 فلسطینی شہید اور 7 افراد زخمی ہوئے ہیں جنہیں قریبی طبی مراکز منتقل کر دیا گیا ہے۔

دوسری جانب، وسطی غزہ میں واقع نصیرات پناہ گزین کیمپ کو بھی نشانہ بنایا گیا، جہاں ایک اسرائیلی ڈرون نے پناہ گزینوں کی آبادی پر گولہ باری کی جس کے باعث 2 افراد موقع پر ہی شہید اور 4 زخمی ہو گئے۔ رپورٹ میں مزید بتایا گیا ہے کہ غزہ کے مختلف حصوں میں کھلے آسمان تلے زندگی گزارنے والے بے گھر فلسطینیوں کے خیموں پر بھی اسرائیلی آرٹلری (گولہ باری) کی گئی ہے، جس میں متعدد معصوم شہریوں کے شہید اور زخمی ہونے کی اطلاعات سامنے آئی ہیں، جس سے پناہ گزینوں میں خوف و ہراس پھیل گیا ہے۔