انڈونیشیا میں علیحدگی پسندوں نے امریکی پائلٹ کو قتل کرکے طیارے کو آگ لگا دی

ڈونیشیا کے شورش زدہ مشرقی صوبے پاپوا میں علیحدگی پسند مسلح باغیوں نے ایک مسافر طیارے پر حملہ کر کے امریکی پائلٹ کو گولی مار کر ہلاک کر دیا اور بعد میں طیارے کو آگ لگا دی۔

عالمی خبر رساں ادارے کے مطابق، انڈونیشیا کی علیحدگی پسند مسلح جماعت “ویسٹ پاپوا نیشنل لبریشن آرمی” کے ترجمان سیبی سامبوم نے اس ہولناک واقعے کی تصدیق کی ہے۔ ترجمان کے مطابق، ہلاک ہونے والے امریکی پائلٹ کی شناخت نکولس ایف گوسیلن کے نام سے ہوئی ہے۔ باغیوں نے الزام عائد کیا ہے کہ یہ طیارہ ان کی بار بار کی تنبیہ کے باوجود انڈونیشی فوجی اہلکاروں کی نقل و حمل کے لیے استعمال ہو رہا تھا، جس پر کارروائی کرتے ہوئے ضلع ہائی یاہوکیمو میں لینڈنگ کے وقت اسے نشانہ بنایا گیا۔ واقعے کے بعد جاری ویڈیو میں مسلح باغیوں کو آزادی کی تحریک کی علامت “مارننگ اسٹار” پرچم لہراتے ہوئے دیکھا جا سکتا ہے۔

دوسری جانب، انڈونیشیا کی وزارتِ ٹرانسپورٹ نے بتایا کہ یہ طیارہ وامینا سے یاہوکیمو جا رہا تھا اور لینڈنگ کے فوراً بعد اس کا رابطہ منقطع ہو گیا تھا۔ یہ ایک مقامی فضائی کمپنی کی ملکیت تھا جو دور دراز علاقوں میں خوراک، ایندھن اور دیگر ضروری سامان پہنچاتا ہے۔ انڈونیشیا کی پولیس اور فوج کے مشترکہ آپریشنز کے ترجمان یوسف سوتیجو نے ہوائی اڈے پر جلا ہوا طیارہ ملنے کی تصدیق کی ہے، تاہم ان کا کہنا ہے کہ پائلٹ کی ہلاکت اور حملے کے پیچھے علیحدگی پسندوں کے ملوث ہونے کی ابھی سرکاری تصدیق کی جا رہی ہے۔ حکام کے مطابق طیارے میں امریکی پائلٹ سمیت 8 افراد سوار تھے جن میں باقی 7 مسافر مقامی پاپوان باشندے تھے۔