دمشق میں کیفے کے قریب کار دھماکا، 5 افراد جاں بحق، 16 زخمی

شام کے دارالحکومت دمشق میں ایک کیفے کے قریب ہونے والے ہولناک کار دھماکے میں 5 افراد جاں بحق اور 16 زخمی ہو گئے ہیں۔

شامی سرکاری خبر ایجنسی کی رپورٹ کے مطابق، یہ دھماکا دمشق کے مصروف علاقے ‘الحجاز’ میں واقع پیلس آف جسٹس (عدالتی ہیڈ کوارٹر) کی عمارت کے قریب کھڑی ایک گاڑی میں ہوا۔ دھماکا اتنا شدید تھا کہ اس کی آواز دور دور تک سنی گئی، جس کے نتیجے میں جانی و مالی نقصان کے ساتھ ساتھ پورے علاقے میں شدید خوف و ہراس پھیل گیا۔

افسوسناک واقعے کی اطلاع ملتے ہی امدادی ٹیمیں اور سکیورٹی فورسز فوری طور پر جائے وقوعہ پر پہنچ گئیں۔ امدادی اہلکاروں نے لاشوں اور زخمیوں کو فوری طور پر قریبی ہسپتالوں میں منتقل کیا، جہاں کئی زخمیوں کی حالت تشویشناک بتائی جاتی ہے۔

دھماکے کے فوراً بعد شامی سکیورٹی فورسز نے پیلس آف جسٹس ہیڈ کوارٹر اور اطراف کے تمام راستوں کو سیل کر کے سکیورٹی کے انتہائی سخت انتظامات کر دیے ہیں۔ شامی خبر ایجنسی کے مطابق، سکیورٹی اداروں نے دھماکے کی اصل نوعیت اور اس کے ذمہ داروں کا تعین کرنے کے لیے باقاعدہ ہائی لیول تحقیقات کا آغاز کر دیا ہے۔