تھائی لینڈ میں 11 سالہ بچے کی گاڑی بدھ مت راہبوں کے قافلے پر چڑھ گئی، 8 ہلاک

تھائی لینڈ کے شمال مشرقی صوبے مکداہان میں ایک انتہائی افسوسناک اور دلدوز ٹریفک حادثے کے نتیجے میں 8 بدھ مت راہب ہلاک اور 20 سے زائد افراد زخمی ہو گئے ہیں۔

بین الاقوامی خبر رساں ایجنسی کے مطابق، یہ المیہ اس وقت پیش آیا جب ایک 11 سالہ بچے کی چلائی جانے والی تیز رفتار گاڑی سڑک کنارے پیدل جانے والے بدھ مت راہبوں کے ایک مذہبی قافلے پر چڑھ گئی۔ حادثے کی شدت اتنی زیادہ تھی کہ 5 راہب موقع پر ہی جاں بحق ہو گئے، جبکہ شدید زخمی ہونے والے مزید 3 راہبوں نے ہسپتال پہنچ کر دم توڑ دیا۔

تھائی حکام نے ہسپتال ذرائع کے حوالے سے بتایا ہے کہ زیر علاج زخمیوں میں سے 4 راہبوں کی حالت اب بھی انتہائی تشویشناک ہے جس کے باعث ہلاکتوں میں اضافے کا خدشہ ہے۔ بتایا گیا ہے کہ یہ راہب اپنی روایتی مذہبی یاترا کے سلسلے میں ایک مندر سے دوسرے مندر کی جانب پیدل سفر کر رہے تھے کہ اس دوران اس ہولناک حادثے کا شکار ہو گئے۔

تھائی لینڈ کی مقامی پولیس کا کہنا ہے کہ واقعے کی باقاعدہ تحقیقات شروع کر دی گئی ہیں، تاہم تاحال کوئی باضابطہ مقدمہ درج نہیں کیا گیا۔ پولیس کے مطابق گاڑی چلانے والا 11 سالہ بچہ حادثے کے بعد شدید ذہنی صدمے (ٹروما) میں ہے اور اس وقت پولیس کو کوئی بھی بیان دینے کی پوزیشن میں نہیں ہے۔