یوکرین کے دارالحکومت کیف میں روسی میزائل اور ڈرون حملہ، 9 افراد ہلاک

یوکرین کے دارالحکومت کیف پر رات گئے روس کی جانب سے کیے گئے ایک بڑے میزائل اور ڈرون حملے کے نتیجے میں کم از کم 9 افراد ہلاک اور درجنوں زخمی ہو گئے ہیں۔ فروری 2022 میں جنگ کے آغاز کے بعد سے روس کی جانب سے یوکرینی شہروں کو نشانہ بنانے کا سلسلہ اب بھی پوری شدت کے ساتھ جاری ہے۔

برطانوی نشریاتی ادارے (BBC) کے مطابق، وسطی اور مشرقی کیف میں موجود عالمی میڈیا کے نمائندوں اور صحافیوں نے 12 سے زائد زور دار دھماکوں کی آوازیں سنیں۔ ان ہولناک دھماکوں کے بعد شہریوں میں شدید خوف و ہراس پھیل گیا اور وہ اپنی جانیں بچانے کے لیے پناہ گاہوں کے طور پر استعمال ہونے والے زیرِ زمین میٹرو اسٹیشنز کی جانب تیزی سے بھاگتے ہوئے دیکھے گئے۔ یہ کارروائی یوکرینی فضائیہ کی جانب سے دارالحکومت کی طرف بڑھنے والے خطرناک بیلسٹک میزائلوں کے بارے میں ہنگامی انتباہ جاری کیے جانے کے فوراً بعد ہوئی۔

کیف کے میئر نے سوشل میڈیا ایپ ‘ٹیلی گرام’ پر صورتحال کی تصدیق کرتے ہوئے بتایا کہ پورے دارالحکومت پر بیلسٹک میزائلوں اور خودکش ڈرونز سے بمباری کی جا رہی ہے اور پورے شہر میں دھماکوں کی گونج سنی جا سکتی ہے۔

دوسری جانب، یوکرین کے صدر وولودیمیر زیلنسکی نے انٹیلی جنس معلومات موصول ہونے کے بعد آئرلینڈ کے دارالحکومت ڈبلن کا اپنا اہم سرکاری دورہ فوری طور پر مختصر کر دیا اور وطن واپس پہنچ گئے۔ ایک ہنگامی پریس کانفرنس سے خطاب کرتے ہوئے صدر زیلنسکی کا کہنا تھا کہ “روس ہمارے ملک پر ایک بڑے اور منظم حملے کی تیاری کر رہا تھا۔ میں اپنے عوام پر زور دیتا ہوں کہ وہ انتہائی احتیاط برتیں، اپنے بچوں اور اہلخانہ کی حفاظت کو یقینی بنائیں اور بنکروں میں پناہ لیں۔ روسیوں نے یوکرین کے خلاف اس بڑے حملے کی تیاری طویل عرصے سے کر رکھی تھی ڈر ہے کہ یہ سلسلہ مزید بڑھ سکتا ہے۔