نائجر میں نیا قانون، ہم جنس پرستی پر کئی بڑے سرکاری افسر گرفتار

مغربی افریقہ کے ملک نائجر میں ہم جنس پرستی کے خلاف ایک نیا اور انتہائی سخت قانون نافذ کر دیا گیا ہے، جس کے فوری بعد قانون کی خلاف ورزی کے الزام میں کسٹمز اور پولیس فورس کے اعلیٰ افسران سمیت کم از کم 16 افراد کو گرفتار کر لیا گیا ہے۔

برطانوی خبر رساں ایجنسی کے مطابق، نائجر میں پہلے صرف ہم جنس شادیوں پر پابندی عائد تھی لیکن ایسے تعلقات پر سزائیں مقرر نہیں تھیں۔ تاہم، نئے قانون کے تحت اب حکومت نے طویل قید اور بھاری جرمانے عائد کر دیے ہیں۔ ایک عدالتی عہدیدار نے تصدیق کی ہے کہ ہم جنس پرستوں کے خلاف کریک ڈاؤن کا یہ آپریشن ابھی جاری ہے اور اب ان جگہوں کو خاص طور پر نشانہ بنایا جائے گا جہاں ایک ہی جنس کے لوگ ساتھ رہتے ہیں، جیسے کہ فوجی بیرکس اور کالجوں کے ہاسٹلز۔

 نئے قانون کی سرکاری دستاویزات کے مطابق سزاؤں کا لائحہ عمل درج ذیل ہے, اگر کوئی شخص ہم جنس پرستی یا اپنی ہی جنس کے فرد کے ساتھ تعلقات قائم کرنے کا قصوروار پایا گیا تو اسے 5 سے 10 سال تک قید اور 1 کروڑ سے 10 کروڑ فرانک (پاکستانی روپوں کے حساب سے لاکھوں روپے) کا بھاری جرمانہ دینا ہوگا۔ ہم جنس شادی پر سزا: آپس میں ہم جنس شادی کرنے والے افراد کو 10 سے 20 سال تک کی سخت ترین جیل کاٹنی پڑے گی۔ ہم جنس پرستوں کے حقوق کے لیے کام کرنے والی این جی اوز یا تنظیمیں چلانے والوں پر 5 کروڑ سے 50 کروڑ فرانک تک کا جرمانہ عائد کیا جائے گا۔

اس پورے معاملے پر جب نائجر کی حکومت کے ترجمان سے مؤقف لینے کی کوشش کی گئی تو انہوں نے کوئی جواب نہیں دیا۔ واضح رہے کہ افریقہ میں یہ رجحان تیزی سے بڑھ رہا ہے اور نائجر سے پہلے اس کے پڑوسی ممالک سینیگال اور برکینا فاسو بھی حال ہی میں ہم جنس پرستی کے خلاف اسی طرح کے سخت قوانین منظور کر چکے ہیں۔