آئرلینڈ نے یورپی یونین کونسل کی گردشی صدارت سنبھال لی

آئرلینڈ نے یورپی یونین کی کونسل کی چھ ماہ کے لیے گردشی صدارت سنبھال لی ہے۔ بڑھتے ہوئے عالمی جغرافیائی و سیاسی (Geopolitical) چیلنجز کے درمیان، آئرلینڈ کو اپنی صدارت کے دوران تقریباً 300 اہم قانون سازی کے معاملات پر پیش رفت کو یقینی بنانا ہوگا۔

عالمی میڈیا کی رپورٹس کے مطابق، ان ترجیحی معاملات میں یورپی یونین کے طویل المدتی بجٹ پر مذاکرات، یورپی دفاع، یوکرین کی مسلسل حمایت، پڑوسی ممالک کے ساتھ تعلقات کی استواری اور ‘مرکوسور’ (Mercosur) تجارتی معاہدہ شامل ہیں۔

آئرلینڈ کا ترجیحی ایجنڈا: آئرش حکومت کے مطابق، اس کی چھ ماہ کی صدارت کا بنیادی محور یورپی یونین کی مسابقتی صلاحیت کو مضبوط بنانا ہوگا۔ اس مقصد کے حصول کے لیے قواعد و ضوابط کو آسان بنایا جائے گا، جبکہ رہائشی، توانائی اور بنیادی ڈھانچے کے منصوبوں کی رفتار تیز کی جائے گی۔ مزید برآں، مشترکہ یورپی مارکیٹ کو مستحکم کرنے سمیت قابلِ اعتماد شراکت داروں کے ساتھ تجارتی روابط کو وسعت دے کر سپلائی چین کو محفوظ بنایا جائے گا۔

رپورٹ میں مزید بتایا گیا ہے کہ آئرش صدارت کے دوران توانائی کے تحفظ، صاف توانائی کی جانب منتقلی، ڈیجیٹل ٹیکنالوجی، مصنوعی ذہانت (AI)، کلاؤڈ کمپیوٹنگ اور زیرِ سمندر مواصلاتی کیبلز کے تحفظ کو بھی خصوصی ترجیح دی جائے گی۔

اس کے ساتھ ساتھ پائیدار زراعت، ماہی گیری، جدت طرازی، ایراسمس پلس (Erasmus+) طلبہ تبادلہ پروگرام، سیمی کنڈکٹرز اور بائیوٹیکنالوجی جیسے اہم شعبوں میں سرمایہ کاری کو فروغ دیا جائے گا۔ آئرلینڈ صحت اور طبی ٹیکنالوجی سے متعلق قوانین کو جدید بنانے پر بھی توجہ مرکوز کرے گا تاکہ یورپی یونین کی اقتصادی اور تزویراتی (Strategic) صلاحیت کو مزید مضبوط اور خود کفیل بنایا جا سکے۔