برطانیہ میں شدید گرمی سے عوام بے حال، جون کا مہینہ 142 سالہ تاریخ کا دوسرا گرم ترین مہینہ رہا

یورپ کے مختلف ممالک کی طرح برطانیہ میں بھی شدید اور ہلاکت خیز گرمی کی لہر (Heatwave) برقرار ہے، جس نے عوام کو بے حال کر دیا ہے۔ برطانوی محکمہ موسمیات کی جانب سے جاری کردہ تازہ ترین اعداد و شمار کے مطابق، برطانیہ میں سال 1884ء سے شروع ہونے والے موسمیاتی ریکارڈ کے بعد سے اب تک کا ‘جون’ دوسرا گرم ترین مہینہ ثابت ہوا ہے۔

رپورٹ کے مطابق، جون 2026ء ملک کی تاریخ کے گرم ترین مہینوں کی فہرست میں شامل ہو گیا ہے، جہاں برطانیہ اور ویلز میں گزشتہ ماہ درجہ حرارت نے پچھلے کئی ریکارڈز کو پسماندہ چھوڑ دیا۔ محکمہ موسمیات کا کہنا ہے کہ سال 2026ء کے دوران اوسط درجہ حرارت معمول سے کہیں زیادہ ریکارڈ کیا گیا، جو عالمی سطح پر بڑھتے ہوئے درجہ حرارت (گلوبل وارمنگ) کے خطرناک رجحان کی واضح نشاندہی کرتا ہے۔

برطانوی میڈیا کی رپورٹس میں انکشاف کیا گیا ہے کہ اس بار جون کے مہینے میں برطانیہ، ویلز اور اسکاٹ لینڈ میں نہ صرف دن کے وقت لو چلی بلکہ رات کے وقت بھی درجہ حرارت کے نئے ریکارڈ قائم ہوئے، جس سے ظاہر ہوتا ہے کہ گرمی کی شدت چوبیس گھنٹے غیر معمولی رہی اور راتوں کو بھی شہریوں کو گرمی سے کوئی ریلیف نہیں مل سکا۔

شدید ترین گرمی کا اندازہ اس بات سے لگایا جا سکتا ہے کہ برطانیہ کے علاقے ‘سرے چارلووڈ’ (Charlwood, Surrey) میں پارہ 35.7 ڈگری سینٹی گریڈ تک جا پہنچا۔ اس سے قبل اس علاقے میں جون کے مہینے کا سب سے زیادہ درجہ حرارت سال 1976ء میں 35.6 ڈگری سینٹی گریڈ ریکارڈ کیا گیا تھا، جو اب 50 سال بعد ٹوٹ گیا ہے۔