غزہ سٹی میں اسرائیلی ڈرون حملہ، 3 فلسطینی شہید، متعدد زخمی

 مظلوم فلسطینیوں پر غزہ پٹی میں اسرائیلی قابض فورسز کے وحشیانہ اور ہلاکت خیز حملوں کا سلسلہ بدستور جاری ہے، جہاں غزہ سٹی میں ہونے والے ایک تازہ ترین ڈرون حملے کے نتیجے میں مزید 3 فلسطینی جامِ شہادت نوش کر گئے جبکہ متعدد افراد شدید زخمی ہو گئے ہیں۔

بین الاقوامی خبر رساں ایجنسی کے مطابق، اسرائیلی فوج کے ڈرون نے غزہ سٹی کے گنجان آباد علاقے ‘شیخ رضوان محلے’ میں واقع دارالارقم اسکول کے قریب بے گناہ شہریوں کے ایک گروپ کو اچانک نشانہ بنایا۔ اس بزدلانہ حملے کے باعث موقع پر موجود متعدد افراد شدید زخمی ہوئے، جنہیں فوری طور پر قریبی طبی مراکز منتقل کیا گیا جہاں زخمیوں میں سے ایک شخص کی حالت انتہائی تشویشناک بتائی جا رہی ہے، جس کے باعث شہداء کی تعداد میں مزید اضافے کا خدشہ ہے۔

غزہ میں وزارتِ صحت کے حکام کی جانب سے جاری کردہ تازہ ترین اعداد و شمار کے مطابق، اکتوبر 2023ء سے شروع ہونے والی یکطرفہ اسرائیلی کارروائیوں اور بمباری کے نتیجے میں اب تک شہید ہونے والے معصوم فلسطینیوں کی کل تعداد بڑھ کر 73 ہزار 69 تک پہنچ گئی ہے، جبکہ اب تک 1 لاکھ 73 ہزار 514 سے زائد افراد زخمی ہو چکے ہیں، جن میں اکثریت خواتین اور بچوں کی ہے۔