چینی وزیر خارجہ کل سے ڈنمارک، سویڈن، فن لینڈ اور ناروے کا دورہ کریں گے

چین کے وزیر خارجہ وانگ یی کل (2 جولائی) سے چار یورپی ممالک کے سرکاری دورے کا آغاز کر رہے ہیں، جہاں وہ مختلف اہم رہنماؤں سے ملاقاتیں کریں گے۔

عالمی میڈیا رپورٹس کے مطابق چین کی وزارت خارجہ کے ترجمان نے بیجنگ میں معمول کی پریس بریفنگ کے دوران میڈیا کو بتایا کہ وزیر خارجہ وانگ یی 2 جولائی سے 8 جولائی تک ڈنمارک، سویڈن، فن لینڈ اور ناروے کا دورہ کریں گے۔

ترجمان نے دورے کے شیڈول کے حوالے سے مزید بتایا کہ اس 7 روزہ دورے کے دوران چینی وزیر خارجہ ان چاروں یورپی ممالک میں اپنے ہم منصبوں اور اعلیٰ حکام سے الگ الگ ملاقاتیں کریں گے۔ ان ملاقاتوں میں دوطرفہ تعلقات کو فروغ دینے، باہمی دلچسپی کے امور اور عالمی و علاقائی صورتحال پر تفصیلی تبادلہ خیال کیا جائے گا۔