دوحہ میں موجود امریکی وفد کی ایرانی حکام سے کوئی ملاقات طے نہیں: قطر

قطر نے تصدیق کی ہے کہ ایک امریکی وفد اس وقت دوحہ میں موجود ہے، تاہم ایرانی حکام کے ساتھ اس کی کوئی براہِ راست ملاقات طے نہیں ہے۔ دوسری جانب ایران نے بھی امریکا کے ساتھ کسی باضابطہ مذاکراتی شیڈول کی سختی سے تردید کر دی ہے۔

خبر ایجنسی کے مطابق قطری وزارتِ خارجہ کے ترجمان نے بتایا کہ امریکی خصوصی ایلچی اسٹیو وٹکوف اور سابق سینئر مشیر جیرڈ کشنر دوحہ پہنچ چکے ہیں۔ ترجمان نے واضح کیا کہ امریکی وفد ایرانی حکام سے براہِ راست ملاقات کرنے کے بجائے قطری ثالثوں سے ملاقاتیں کرے گا، جس میں امریکا اور ایران کے درمیان جاری سفارتی پیش رفت پر تبادلہ خیال کیا جائے گا۔

قطری ترجمان نے یہ اہم انکشاف بھی کیا کہ ایران کے 6 ارب ڈالر مالیت کے منجمد اثاثے تاحال تہران منتقل نہیں کیے گئے اور ان فنڈز کی منتقلی کا معاملہ دونوں ممالک کے درمیان مذاکرات میں ہونے والی پیش رفت سے مشروط ہے۔

ترجمان کے مطابق، گزشتہ ہفتے امریکا اور ایران کے درمیان بڑھنے والی کشیدگی کو کم کرنے کے لیے خصوصی ہاٹ لائن کا استعمال کیا گیا تھا۔ انہوں نے مزید کہا کہ قطر، عمان کے ساتھ مل کر آبنائے ہرمز سے تجارتی جہازوں کی محفوظ آمدورفت یقینی بنانے کے لیے مسلسل رابطے میں ہے اور اس اہم آبی گزرگاہ میں جہاز رانی کی آزادی کو بنیادی اہمیت دیتا ہے۔

یاد رہے کہ گزشتہ روز امریکی صدر ڈونلڈ ٹرمپ اور وائٹ ہاؤس کی جانب سے یہ دعویٰ کیا گیا تھا کہ امریکا اور ایران کے درمیان دوحہ میں مذاکرات متوقع ہیں اور امریکی وفد اسی مقصد کے لیے قطر روانہ ہو رہا ہے۔ وائٹ ہاؤس کی ترجمان کیرولین لیویٹ نے بھی اسٹیو وٹکوف اور جیرڈ کشنر کے اس متوقع اجلاس کے لیے دوحہ جانے کی تصدیق کی تھی۔

تاہم، ایران نے ان تمام دعوؤں کو مسترد کر دیا ہے۔ ایرانی وزارتِ خارجہ کے ترجمان اسماعیل بقائی نے واضح کیا ہے کہ امریکا کے ساتھ کسی نئی ملاقات یا مذاکرات کا کوئی شیڈول طے نہیں پایا۔ انہوں نے کہا کہ ایرانی تکنیکی وفد کا دورۂ دوحہ ایک الگ معاملہ ہے اور اس کا امریکی وفد کے دورے سے کوئی تعلق نہیں، جبکہ دونوں وفود کے درمیان کسی بھی ملاقات کا کوئی پروگرام طے نہیں ہے۔

English Slug: