آبنائے ہرمز کو کسی بھی خطرے سے محفوظ رکھنا ایران کی ذمہ داری ہے: عمان

سلطنتِ عمان کے وزیر خارجہ بدر بن حمد البوسعیدی نے واضح کیا ہے کہ اسلام آباد مفاہمتی یادداشت کے تحت آبنائے ہرمز کو کسی بھی قسم کے خطرے سے محفوظ رکھنا مکمل طور پر ایران کی ذمہ داری ہے۔

عمانی وزیر خارجہ نے اپنے ایک بیان میں کہا کہ اگر درخواست کی گئی تو عمان خطے اور عالمی سطح پر ان تمام کوششوں میں تعاون کرنے کے لیے ہمہ وقت تیار ہے جو بین الاقوامی سمندری راستوں کے تحفظ اور سلامتی کے لیے کی جائیں۔ تاہم، انہوں نے دوٹوک الفاظ میں کہا کہ عمان آبنائے ہرمز سے گزرنے والے بحری جہازوں پر کسی بھی قسم کی لازمی ٹرانزٹ فیس عائد کرنے کی حمایت نہیں کرتا۔ ان کا کہنا تھا کہ سمندری، ماحولیاتی اور جہاز رانی سے متعلق خدمات کے عوض فیس پر رضاکارانہ بنیادوں پر بات چیت کی جا سکتی ہے، جن میں بحری راستوں کی حفاظت، سمندر کو آلودگی سے بچانا اور ہنگامی حالات سے نمٹنے کی تیاری شامل ہے۔ ان خدمات کے عوض فیس پر متعلقہ ممالک اور شپنگ کمپنیوں کے ساتھ مشاورت ممکن ہے۔

اس سے قبل ایرانی نائب وزیر خارجہ کاظم غریب آبادی نے دعویٰ کیا تھا کہ عمان کے ساتھ آبنائے ہرمز کے معاملے پر ایک مشترکہ حکمت عملی پر اتفاق رائے طے پا گیا ہے۔ دونوں ممالک نے اس اہم ترین آبی گزرگاہ کے مستقبل کے انتظام سے متعلق تفصیلی تبادلۂ خیال کیا ہے اور کئی امور پر مشترکہ رائے کا اظہار کیا گیا ہے۔ ایرانی نائب وزیر خارجہ کے مطابق، عمان نے بھی ایک ساحلی ریاست ہونے کے ناطے ان انتظامات میں کردار ادا کرنے کی حمایت کی ہے اور عمان کا مؤقف ہے کہ آبنائے ہرمز سے فراہم کی جانے والی خدمات کے عوض فیس وصول کی جانی چاہئے۔ انہوں نے مزید بتایا کہ دونوں ممالک کے درمیان تکنیکی کمیٹیاں قائم کی جائیں گی، جبکہ ماہرین آئندہ سات سے آٹھ دن کے اندر خصوصی مذاکرات شروع کریں گے تاکہ ایک قانونی مسودہ تیار کر کے بحری جہازوں کے راستوں سے متعلق امور کو حتمی شکل دی جا سکے۔