آئندہ چند روز میں امریکا کے ساتھ کسی بھی سطح پر مذاکرات طے نہیں: اسماعیل بقائی

ایرانی وزارتِ خارجہ کے ترجمان اسماعیل بقائی نے واضح کیا ہے کہ آنے والے چند دنوں میں امریکا کے ساتھ کسی بھی سطح پر کوئی براہِ راست یا بالواسطہ مذاکرات طے نہیں ہیں۔

ترجمان ایرانی وزارتِ خارجہ نے تفصیلات بتاتے ہوئے کہا کہ امریکا سے مذاکرات کی ذمہ دار ایرانی ٹیم جلد ہی دوحہ (قطر) کا دورہ ضرور کرے گی، تاہم اس دورے کا مقصد نئے مذاکرات کا آغاز کرنا نہیں ہے۔ ان کا کہنا تھا کہ اس دورے کا واحد مقصد فریقین کے درمیان پہلے سے طے شدہ مفاہمتی یادداشت کی شقوں پر عمل درآمد کا جائزہ لینا اور اس پر ہونے والی پیشرفت کا جائزہ لینا ہے۔

اسماعیل بقائی نے ان افواہوں کو بھی مسترد کر دیا کہ قطر میں دونوں وفود کی ملاقات ہو سکتی ہے۔ انہوں نے دوٹوک انداز میں کہا کہ انھی دنوں قطر جانے والے امریکی نمائندوں کے دورے کا ایرانی وفد کے دورے سے کوئی تعلق نہیں ہے اور یہ دونوں الگ الگ معاملات ہیں۔