ایران امریکہ نے ایک دوسرے پر حملے روکنے پر اتفاق کر لیا، امریکی نیوز ویب سائٹ

ایک امریکی نیوز ویب سائٹ نے دعویٰ کیا ہے کہ شدید کشیدگی کے بعد بالآخر ایران اور امریکہ نے ایک دوسرے پر حملے روکنے پر اتفاق کر لیا ہے اور دونوں ممالک نے اسی ہفتے مذاکرات کی میز پر بیٹھنے کا بھی فیصلہ کیا ہے۔

امریکی نیوز ویب سائٹ نے ایک سینئر امریکی عہدیدار کا حوالہ دیتے ہوئے رپورٹ دی ہے کہ دونوں ممالک آبنائے ہرمز کے سنگین تنازع کو حل کرنے کے لیے منگل کے روز قطر کے دارالحکومت دوحہ میں اعلیٰ سطح کی ملاقات کرنے پر راضی ہو گئے ہیں۔ امریکی عہدیدار کے مطابق، دوحہ مذاکرات کے دوران آبنائے ہرمز سے متعلق تنازعات اور دیگر اہم علاقائی و سیکیورٹی امور پر تفصیلی بات چیت کی جائے گی۔رپورٹ میں بتایا گیا ہے کہ اس سے قبل ایک اعلیٰ ایرانی عہدیدار نے مؤقف اختیار کیا تھا کہ حالیہ امریکی حملوں اور دونوں ممالک کے درمیان طے شدہ مفاہمت کی یادداشت (MoU) کی شرائط کی خلاف ورزی پر ایران نے اتوار کو ہونے والے تکنیکی مذاکرات میں حصہ نہیں لیا تھا اور ان کا بائیکاٹ کیا تھا۔  واضح رہے کہ دونوں ممالک کے درمیان جنگ بندی کو 11 روز گزر چکے ہیں، تاہم حالیہ دنوں میں دونوں جانب سے دوبارہ کیے جانے والے حملوں اور جوابی کارروائیوں کے باعث یہ جنگ بندی شدید غیر یقینی صورتحال کا شکار ہو گئی تھی، جس کے بعد اب دوبارہ حملے روکنے اور مذاکرات بحال کرنے پر اتفاق ہوا ہے۔