ایرانی سپریم لیڈر کا امریکی و اسرائیلی حملوں پر قانونی کارروائی کا حکم

ایرانی سپریم لیڈر مجتبیٰ خامنہ ای نے ملکی عدلیہ کو ہدایت جاری کی ہے کہ وہ امریکا اور اسرائیل کے خلاف مبینہ جنگی جرائم پر ملکی اور بین الاقوامی سطح پر مؤثر قانونی کارروائی کا آغاز کرے۔

انہوں نے عدلیہ پر زور دیا کہ گزشتہ سال سے ایران پر ہونے والے امریکی اور اسرائیلی حملوں کے نتیجے میں ملک اور عوام کو پہنچنے والے نقصانات کے ازالے اور متاثرہ حقوق کی بحالی کے لیے تمام ممکنہ قانونی اقدامات کیے جائیں۔ سپریم لیڈر کا کہنا تھا کہ بعض امریکی اور اسرائیلی رہنماؤں کے بیانات مبینہ طور پر مجرمانہ ذمہ داری کے اعتراف کے مترادف ہیں، جو ایرانی قوم کے حقوق کی بحالی کے لیے ٹھوس قانونی بنیاد فراہم کرتے ہیں۔ مجتبیٰ خامنہ ای نے واضح کیا کہ عدلیہ کی ذمہ داری صرف انفرادی مقدمات تک محدود نہیں بلکہ عوامی حقوق کا تحفظ، قانونی آزادیوں کا فروغ، انصاف کا قیام، بدعنوانی کا خاتمہ، اور قومی مفادات کا دفاع بھی اس کے دائرہ اختیار میں شامل ہے، جس سے عدالتی نظام پر عوام کا اعتماد مضبوط ہوگا۔

انہوں نے جون 2025 اور فروری 2026 میں امریکا اور اسرائیل کی جانب سے ایران پر کیے گئے حملوں کا حوالہ دیتے ہوئے کہا کہ ان کارروائیوں کے نتیجے میں جاں بحق افراد، زخمیوں اور ملکی نقصانات کی بنیاد پر ہزاروں قانونی مقدمات دائر کیے جا سکتے ہیں۔ سپریم لیڈر نے میناب اور لامرد میں بچوں کی ہلاکتوں، طبی مراکز اور عوامی تنصیبات پر حملوں کو سنگین جنگی جرائم قرار دیتے ہوئے کہا کہ دشمن کے اعترافی بیانات کو قانونی دعوؤں کی مضبوطی کے لیے بطور شواہد استعمال کیا جائے تاکہ مستقبل میں ایسے واقعات کا راستہ روکا جا سکے۔