سعودی عرب میں آئل کمپنی کا ہیلی کاپٹر گرکر تباہ، 14 افراد جاں بحق

سعودی عرب میں تیل کی معروف سرکاری کمپنی “سعودی آرامکو” کا ایک ہیلی کاپٹر گر کر تباہ ہو گیا، جس کے نتیجے میں ہیلی کاپٹر میں سوار تمام 14 افراد جاں بحق ہو گئے۔

سعودی سرکاری خبر رساں ادارے (ایس پی اے) کے مطابق وزارتِ توانائی نے حادثے کی تصدیق کرتے ہوئے بتایا کہ یہ افسوسناک واقعہ اتوار کے روز ‘راس تنورہ’ کے علاقے میں پیش آیا۔ تباہ ہونے والا ہیلی کاپٹر سعودی آرامکو کی ملکیت تھا۔ سعودی میڈیا کا کہنا ہے کہ حادثے کی اطلاع ملتے ہی امدادی اور ریسکیو ٹیمیں فوری طور پر جائے وقوعہ پر پہنچ گئیں اور لاشوں کو نکالنے سمیت تمام امدادی کارروائیاں مکمل کر لیں۔ حکام کی جانب سے حادثے کی اصل وجوہات کا تعین کرنے کے لیے باضابطہ تحقیقات کا آغاز کر دیا گیا ہے۔ تاہم، ابھی تک حادثہ پیش آنے کی وجہ یا جاں بحق ہونے والے افراد کی شناخت کے حوالے سے مزید تفصیلات جاری نہیں کی گئیں۔