مقبوضہ مغربی کنارے، غزہ پٹی میں میں یہودی آباد کاروں کے فلسطینیوں پر حملے جاری

مقبوضہ مغربی کنارے اور غزہ کی پٹی میں فلسطینیوں کے خلاف اسرائیلی فورسز اور انتہا پسند یہودی آبادکاروں کی پرتشدد کارروائیوں کا سلسلہ تھم نہ سکا، جس سے پورے خطے میں صورتحال انتہائی کشیدہ ہو گئی ہے۔

مقبوضہ بیت المقدس (یروشلم) کے مشرقی علاقوں سے موصول ہونے والی اطلاعات کے مطابق، انتہا پسند یہودی آبادکاروں نے نہتے فلسطینیوں پر ہلہ بول دیا۔ اسی طرح مغربی کنارے کے تاریخی شہر نابلوس میں آبادکاروں کے ایک اور منظم حملے کے نتیجے میں ایک 16 سالہ فلسطینی لڑکا سر پر پتھر لگنے سے شدید زخمی ہو گیا، جسے فوری طور پر طبی امداد کے لیے ہسپتال منتقل کیا گیا ہے۔ یہ ہتھکنڈے رملہ کے مشرق میں واقع فلسطینی آبادیوں میں بھی دہرائے گئے، جہاں آبادکاروں نے املاک کو نقصان پہنچایا۔ دوسری جانب، مقبوضہ غزہ کی پٹی پر بھی اسرائیلی جارحیت کا سلسلہ جاری ہے۔ اسرائیلی فضائیہ کے جنگی طیاروں نے غزہ کے وسطی علاقے ‘دیر البلاح’ کے مشرق میں واقع ایک کھلے اور زرعی علاقے پر اچانک فضائی حملہ کیا۔ سوشل میڈیا پر سامنے آنے والی فوٹیج اور عینی شاہدین کے مطابق، اسرائیلی جیٹس نے زرعی زمینوں کو نشانہ بناتے ہوئے کم از کم دو تباہ کن میزائل داغے، جس سے زمینوں پر گہرے گڑھے پڑ گئے اور قریبی آبادیوں میں خوف و ہراس پھیل گیا۔

سفارتی اور انسانی حقوق کے حلقوں نے ان حملوں کی شدید مذمت کرتے ہوئے یاد دلایا ہے کہ محصور غزہ پر یہ تازہ ترین فضائی کارروائی ایک ایسے وقت میں کی گئی ہے جب وہاں تقریباً روزانہ کی بنیاد پر بمباری کی جا رہی ہے۔ ماہرین کے مطابق، یہ مسلسل حملے گزشتہ سال اکتوبر میں طے پانے والے نام نہاد “جنگ بندی” معاہدے کی کھلی اور سنگین خلاف ورزی ہیں، جس سے یہ امن معاہدہ اب محض کاغذ کا ٹکڑا بن کر رہ گیا ہے۔