لبنان کے ساتھ معاہدہ ایران اور حزب اللہ کیلئے دھچکا ہے، نیتن یاہو

اسرائیلی وزیرِ اعظم بنجمن نیتن یاہو نے لبنان کے ساتھ ہونے والے حالیہ فریم ورک معاہدے کا خیر مقدم کرتے ہوئے اسے اسرائیل کے لیے ایک ‘تاریخی کامیابی’ قرار دیا ہے۔ ان کا کہنا ہے کہ امریکی ثالثی میں طے پانے والا یہ معاہدہ ایران اور حزب اللہ کے گٹھ جوڑ کے لیے ایک بہت بڑا دھچکا ہے۔

معاہدے پر اپنے ردعمل کا اظہار کرتے ہوئے نیتن یاہو نے واضح کیا کہ اس اقدام سے خطے میں اسرائیل کی پوزیشن مزید مضبوط ہوئی ہے اور حزب اللہ کا عسکری اثر و رسوخ کمزور ہوگا۔ لبنان معاہدے پر گفتگو کے ساتھ ساتھ اسرائیلی وزیرِ اعظم نے ملکی سیاست پر بھی بڑا بیان دیا ہے۔ انہوں نے دعویٰ کیا ہے کہ وہ رواں سال اسرائیل میں ہونے والے عام انتخابات کے بعد ملک میں ایک وسیع تر قومی حکومت تشکیل دیں گے، جو ملک کو درپیش سیکیورٹی اور اقتصادی چیلنجز سے نکالنے میں مددگار ثابت ہوگی۔ مبصرین کا کہنا ہے کہ نیتن یاہو کی جانب سے انتخابات سے قبل اس معاہدے کو اپنی بڑی کامیابی کے طور پر پیش کیا جا رہا ہے تاکہ وہ عوامی سطح پر اپنی سیاسی پوزیشن کو مزید مستحکم کر سکیں۔