ایرانی حکومت بھی قاسم سلیمانی سے خوف زدہ تھی، ڈونلڈ ٹرمپ کا دعویٰ

امریکی صدر ڈونلڈ ٹرمپ نے ایک نیا اور حیران کن دعویٰ کیا ہے کہ ایرانی حکومت خود اپنی قدس فورس کے کمانڈر جنرل قاسم سلیمانی سے خوف زدہ تھی اور امریکا کی جانب سے انہیں ہلاک کیے جانے کے بعد تہران کی قیادت اندرونی طور پر ’’خوش‘‘ تھی۔ روڈ ٹو میجورٹی کانفرنس‘‘ سے خطاب کرتے ہوئے ڈونلڈ ٹرمپ نے جنوری 2020 میں قاسم سلیمانی کی ہلاکت کا باعث بننے والے امریکی ڈرون حملے کا دفاع کیا۔ انہوں نے اس کارروائی کو ’’مشرقِ وسطیٰ کی تاریخ کے اہم ترین واقعات میں سے ایک‘‘ قرار دیتے ہوئے مؤقف اختیار کیا کہ اس نے خطے کی سیکیورٹی کی صورت حال کو یکسر بدل کر رکھ دیا۔ ایرانی قیادت کے حوالے سے  ڈونلڈ ٹرمپ کا کہنا تھا”میرے خیال میں علی خامنہ ای اور ایران میں دیگر اعلیٰ حکام بھی اس بات پر خوش تھے کہ میں نے قاسم سلیمانی کو ختم کیا، کیونکہ ایرانی حکومت خود ان سے خوف زدہ تھی۔ سلیمانی ایران کی قیادت کے لیے بھی حد سے زیادہ طاقت ور شخصیت بن چکے تھے۔”

ٹرمپ نے قاسم سلیمانی کو اپنے پہلے دورِ حکومت کے دوران قتل کروائے جانے کا حوالہ دیتے ہوئے انہیں ایک ‘جینئس’ (ذہین شخص) بھی قرار دیا، تاہم ساتھ ہی الزام عائد کیا کہ وہ امریکی فوجیوں کو نشانہ بنانے میں ملوث تھے۔ واضح رہے کہ جنرل قاسم سلیمانی کو 3 جنوری 2020 کو عراق کے دارالحکومت بغداد میں بین الاقوامی ایئرپورٹ کے قریب ایک امریکی ڈرون حملے میں نشانہ بنایا گیا تھا۔ کانفرنس کے دوران ڈونلڈ ٹرمپ نے روایتی طنزیہ انداز اپناتے ہوئے اور آواز کی نقل اتارتے ہوئے مضحکہ خیز دعویٰ کیا کہ اب کوئی بھی ایران کا صدر بننا نہیں چاہتا۔ ان کا کہنا تھا کہ جب وہاں پوچھا جاتا ہے کہ صدر کون بنے گا، تو سب آگے سے کہتے ہیں، “نہیں نہیں، شکریہ!” دوسری جانب، فوجی رابطے کا نیا چینل قائم کرنے سے متعلق بیانات کو ایران کی جانب سے سراسر جھوٹ قرار دے کر مسترد کر دیا گیا ہے اور ایرانی حکام نے اس کی سخت تردید کی ہے۔