معاہدے کا مقصد اسرائیلی افواج کا تمام لبنانی علاقوں سے انخلا یقینی بنانا ہے: لبنانی وزیراعظم

لبنان کے وزیراعظم نواف سلام نے کہا ہے کہ لبنان اور اسرائیل کے درمیان طے پانے والے فریم ورک معاہدے کا بنیادی مقصد اسرائیلی افواج کا تمام لبنانی علاقوں سے مکمل انخلا، ان علاقوں پر ریاست کی خودمختاری کی بحالی اور بے گھر ہونے والے شہریوں کی اپنے گھروں کو واپسی کو یقینی بنانا ہے۔ سوشل میڈیا پلیٹ فارم ‘ایکس’ (سابقہ ٹویٹر) پر جاری اپنے ایک بیان میں وزیراعظم نواف سلام نے واضح کیا کہ اس معاہدے کے تحت لبنان کی یہ اہم ذمہ داری ہے کہ وہ اپنی قومی مسلح افواج کے ذریعے ملک کے تمام حصوں میں ریاستی عملداری اور قانون کی حکمرانی کو قائم کرے۔

وزیراعظم نے اس تاریخی معاہدے تک پہنچنے میں مدد اور اہم کردار ادا کرنے پر امریکا، عرب ممالک اور تمام عالمی دوستوں کا تہہ دل سے شکریہ ادا کیا۔ انہوں نے کہا کہ وہ اب اس لمحے کے شدت سے منتظر ہیں جب اسرائیل اپنی افواج کا باقاعدہ انخلا شروع کرے گا۔ نواف سلام نے مزید کہا کہ ہمیں اس بات کا بھی انتظار ہے کہ جنگ کی وجہ سے بے گھر ہونے والے لبنانی شہری اب محفوظ اور باوقار انداز میں اپنے گھروں کو واپس لوٹ سکیں تاکہ متاثرہ علاقوں میں تعمیرِ نو کا عمل جلد از جلد شروع کیا جا سکے۔