عمان نے آبنائے ہرمز سے گزرنے والے بحری جہازوں سے رقم لینے کا عندیہ دیدیا

سلطنتِ عمان نے یورپی حکام کو باضابطہ طور پر آگاہ کیا ہے کہ آبنائے ہرمز سے گزرنے والے تجارتی و بحری جہازوں کو مستقبل میں راہداری کے لیے رقم (ٹول فیس) ادا کرنا پڑ سکتی ہے۔ عمانی حکام کا کہنا ہے کہ آبنائے ہرمز کی صورتحال کو اب کسی بھی طرح جنگ سے پہلے کے حالات پر واپس نہیں لے جایا جا سکتا، اس لیے یہاں سے گزرنے والے جہازوں سے کچھ نہ کچھ فیس لی جا سکتی ہے۔ عمانی حکام نے واضح کیا کہ عمان ہمیشہ بین الاقوامی سمندری قوانین کی مکمل پابندی کرے گا، تاہم آبنائے ہرمز کو ماحولیاتی آلودگی سے پاک رکھنے اور اس اہم بحری گزرگاہ میں جہازوں کو محفوظ راہداری کی خدمات فراہم کرنے کے عوض یہ فیس وصول کی جا سکتی ہے۔ دوسری جانب، خلیجی ملک قطر نے بھی آبنائے ہرمز سے ٹول فیس کی اس ممکنہ وصولی کے حوالے سے ملا جلا (مبہم) سگنل دے دیا ہے۔