ایران کو اپنے دفاع کا مکمل حق حاصل ہے، اسماعیل بقائی

ایرانی وزارتِ خارجہ کے ترجمان اسماعیل بقائی نے دوٹوک الفاظ میں کہا ہے کہ ایران کو اپنی خودمختاری، سلامتی اور علاقائی سالمیت کے دفاع کا فطری اور قانونی حق حاصل ہے۔ اپنے ایک اہم بیان میں ترجمان اسماعیل بقائی کا کہنا تھا کہ امریکا اور اسرائیل کی خطے میں جاری کارروائیوں پر خلیجی ممالک کو بھی جوابدہ ہونا چاہیے، کیونکہ خطے میں ہونے والی کسی بھی پیش رفت کے اثرات کسی ایک ملک تک محدود نہیں رہتے بلکہ پورے خطے پر مرتب ہوتے ہیں۔ انہوں نے ایران کے دفاعی نظام پر روشنی ڈالتے ہوئے کہا کہ ایران کی دفاعی صلاحیتیں خالصتاً قومی سلامتی کے تحفظ اور خطے کے استحکام کی ضامن ہیں، اور ملک اپنی دفاعی استعداد کو ہمیشہ اسی مقصد کے لیے برقرار رکھے ہوئے ہے۔ترجمان ایرانی وزارتِ خارجہ نے مزید واضح کیا کہ کسی بھی قسم کی بیرونی جارحیت کی صورت میں ایران اپنے دفاع کا حق محفوظ رکھتا ہے اور اپنی قومی سلامتی کے تحفظ کے لیے ہر ممکنہ اور ضروری اقدامات کرنے کا مکمل اختیار رکھتا ہے۔