کنگ چارلس ذاتی ٹیکس بل عام کرنے والے پہلے برطانوی بادشاہ بن گئے

برطانوی تاریخ میں پہلی بار کنگ چارلس سوم نے ایک منفرد مثال قائم کرتے ہوئے بطور بادشاہ اپنا پہلا ذاتی ٹیکس بل پبلک کر دیا ہے، جبکہ دوسری جانب شاہی خاندان کو ملنے والے سالانہ سرکاری فنڈز (Sovereign Grant) کو دگنا کر کے تقریباً 100 ملین پاؤنڈز (10 کروڑ پاؤنڈز) تک پہنچانے کا فیصلہ کیا گیا ہے۔

برطانوی میڈیا کے مطابق، شاہی خاندان کے سالانہ اکاؤنٹس کی رپورٹ جاری کر دی گئی ہے جس کے تحت کنگ چارلس نے مالی سال کے دوران تقریباً 12.9 ملین پاؤنڈز (ایک کروڑ 29 لاکھ پاؤنڈز) ٹیکس ادا کیا۔ اس اقدام کے ساتھ وہ اپنی آمدنی اور ادا کردہ ٹیکس کی تفصیلات عوامی سطح پر ظاہر کرنے والے برطانیہ کے پہلے فرماں روا بن گئے ہیں۔ شاہی محل کے ذرائع کا کہنا ہے کہ اس اقدام کا مقصد بادشاہت کے نظام میں مالی شفافیت لانا ہے۔

دوسری جانب، برطانوی خزانے کی جانب سے شاہی خاندان کی دفتری سرگرمیوں، محلات کی دیکھ بھال اور سفری اخراجات کے لیے دیے جانے والے فنڈ “سوویرین گرانٹ” میں ریکارڈ اضافہ کیا جا رہا ہے۔ یہ فنڈز 51.5 ملین پاؤنڈز سے بڑھا کر اگلی مدت کے لیے 100 ملین پاؤنڈز سے زائد کر دیے جائیں گے۔