اسرائیلی صدر کے ہیلی کاپٹر سے پرندہ ٹکرا گیا، ہنگامی لینڈنگ

اسرائیلی صدر اسحاق ہرزوگ کے ہیلی کاپٹر کو دورانِ پرواز پرندہ ٹکرانے کے باعث ہنگامی لینڈنگ کرنا پڑی، تاہم خوش قسمتی سے اس واقعے میں کوئی جانی نقصان نہیں ہوا۔اسرائیلی میڈیا کی رپورٹس کے مطابق یہ واقعہ اس وقت پیش آیا جب اسرائیلی صدر مقبوضہ بیت المقدس سے شمالی اسرائیل کی جانب سفر کر رہے تھے۔ پرواز کے دوران اچانک ایک پرندہ ہیلی کاپٹر سے ٹکرا گیا، جس کے بعد پائلٹ نے حفاظتی اقدامات کے تحت فوری طور پر ہیلی کاپٹر کی ہنگامی لینڈنگ کی۔حکام کی جانب سے اس بات کی تصدیق کی گئی ہے کہ پرندہ ٹکرانے کے اس واقعے میں صدر اسحاق ہرزوگ اور عملے کے تمام افراد محفوظ رہے اور کسی قسم کا کوئی جانی یا مالی نقصان نہیں ہوا۔ واقعے کے فوراً بعد حفاظتی پروٹوکول کے تحت متبادل انتظامات کیے گئے، جس کے بعد اسرائیلی صدر نے ایک دوسرے ہیلی کاپٹر کے ذریعے اپنی منزل کی جانب اپنا سفر جاری رکھا۔