دشمن کی دشمنی محض معاہدے پر دستخط سے ختم نہیں ہوتی: ایران

ایران کی وزارتِ خارجہ کے ترجمان اسماعیل بقائی نے امریکہ کے ساتھ جاری سفارتی عمل پر سخت موقف اختیار کرتے ہوئے کہا ہے کہ کسی بھی دشمن کی دشمنی محض ایک معاہدے پر دستخط کر دینے سے ختم نہیں ہوتی، ایران اب بھی امریکہ کے رویے کو باریک بینی سے دیکھ رہا ہے۔ ترجمان اسماعیل بقائی کا کہنا تھا کہ مفاہمتی یادداشت (MoU) کے حوالے سے واشنگٹن کی جانب سے مسلسل متضاد اور مبہم بیانات سامنے آ رہے ہیں۔ انہوں نے تاکید کی کہ امریکہ کو مفاہمتی یادداشت کے واضح متن کے منافی اپنی من پسند تشریحات کرنے سے مکمل گریز کرنا چاہیے اور اب لیت و لعل کے بجائے اپنے کیے گئے وعدے پورے کرنے چاہئیں۔اسماعیل بقائی نے نیٹو (NATO) کے سیکریٹری جنرل مارک روٹے کے حالیہ متنازع بیان پر ردِعمل دیتے ہوئے کہا کہ نیٹو چیف کا بیان دراصل اس بات کا کھلا اعتراف ہے کہ نیٹو اتحاد نے ایک خودمختار ملک کے خلاف غیر قانونی جنگ میں حصہ لیا۔ انہوں نے مطالبہ کیا کہ بین الاقوامی قوانین کی اس سنگین خلاف ورزی پر نیٹو کو عالمی سطح پر جواب دہ ٹھہرایا جانا چاہیے۔دوسری جانب، ایران کے اعلیٰ مذاکرات کار اور پارلیمنٹ کے سپیکر محمد باقر قالیباف نے بھی امریکی انتظامیہ کے حالیہ دعووں کو یکسر مسترد کر دیا ہے۔ باقر قالیباف کا واشنگٹن کو کرارا جواب دیتے ہوئے کہنا تھا:”امریکہ کے یہ دعوے سراسر غلط ہیں؛ ایران اپنے منجمد اثاثوں کی بحالی کے بعد ان فنڈز کو کسی بھی صورت امریکی زرعی اجناس خریدنے پر خرچ نہیں کرے گا، ہم اپنی ترجیحات کا فیصلہ خود کریں گے۔”