سوئٹزرلینڈ مذاکرات, 12 ارب ڈالر کے منجمد اثاثوں کے اجرا کے لیے دستخط کو حتمی شکل دے دی گئی

ایرانی پارلیمنٹ (مجلس) کے اسپیکر محمد باقر قالیباف نے ایک تاریخی سفارتی کامیابی کی تصدیق کرتے ہوئے بتایا ہے کہ سوئٹزرلینڈ میں ہونے والے اعلیٰ سطح کے مذاکرات کے نتیجے میں بیرونِ ملک منجمد کیے گئے 12 ارب ڈالر کے ایرانی اثاثوں کے فوری اجرا کے لیے دستخطوں کے عمل کو حتمی شکل دے دی گئی ہے۔ یہ پیش رفت امریکہ اور ایران کے مابین جاری حالیہ سفارتی مفاہمت کا ایک بڑا نتیجہ قرار دی جا رہی ہے۔

دوسری جانب، ایک اہم علاقائی مشن کے تحت ایرانی پارلیمنٹ کے اسپیکر اور مذاکراتی ٹیم کے سربراہ محمد باقر قالیباف اور وزیر خارجہ عباس عراقچی اسٹریٹجک اہمیت کی حامل ‘آبنائے ہرمز’ (Strait of Hormuz) سے متعلق امور پر ہنگامی بات چیت کے لیے سلطنتِ عمان پہنچ گئے ہیں۔ عمانی قیادت سے ملاقاتوں کے بعد ایرانی اسپیکر نے میڈیا کو بتایا کہ عالمی تجارت کے لیے انتہائی حساس سمجھی جانے والی آبنائے ہرمز میں بحری جہازوں کی محفوظ آمدورفت کے حوالے سے دونوں ممالک کے درمیان ‘رابطے کا ایک جدید نظام’ قائم کرنے پر مکمل اتفاق کیا گیا ہے۔ اس نظام کا بنیادی مقصد بحری گزرگاہ میں کسی بھی ممکنہ فوجی تصادم، غلط فہمی یا سیکیورٹی کشیدگی سے بچنا اور محفوظ نقل و حرکت کو یقینی بنانا ہے۔ انہوں نے مزید انکشاف کیا کہ سوئٹزرلینڈ میں ہونے والی کثیر الجہتی بات چیت کی بنیاد پر لبنان کی علاقائی سالمیت اور خودمختاری کی بین الاقوامی ضمانت دینے پر بھی اصولی اتفاق کر لیا گیا ہے۔

ادھر تہران میں پریس بریفنگ کے دوران ایرانی وزارتِ خارجہ کے ترجمان اسماعیل بقائی نے جوہری پروگرام کے حوالے سے ملک کا موقف واضح کرتے ہوئے کہا ہے کہ ایران اپنے پہلے سے طے شدہ اصولی طریقہ کار کے مطابق بین الاقوامی جوہری توانائی ایجنسی (IAEA) کے ساتھ تکنیکی تعاون کا سلسلہ جاری رکھے گا۔ تاہم، انہوں نے واشنگٹن اور عالمی برادری پر واضح کیا کہ جوہری معاملات سے متعلق تمام تر حتمی فیصلے ایرانی مشاورتی اسمبلی (پارلیمنٹ) اور سپریم نیشنل سیکیورٹی کونسل کی وضع کردہ قومی پالیسیوں اور ہدایات کے مطابق ہی کیے جائیں گے۔

واضح رہے کہ ان مثبت سفارتی سفارت کاری کے نتیجے میں امریکہ نے ایران پر عائد اقتصادی پابندیوں میں نرمی کرتے ہوئے ایرانی تیل کی فروخت پر عائد پابندی عارضی طور پر اٹھا لی ہے۔ اس بڑی امریکی چھوٹ کے بعد ایران آئندہ 2 ماہ تک امریکہ سمیت دنیا بھر کی بین الاقوامی مارکیٹ میں اپنی پیٹرولیم اور دیگر مصنوعات قانونی طور پر فروخت کرنے کا مجاز ہوگا