عالمی مالیاتی ادارے بارکلے نے پاکستان کے خودمختار ڈالر بانڈز کی درجہ بندی اپ گریڈ کر دی۔

عالمی مالیاتی ادارے بارکلے (Barclays) نے پاکستان کے معاشی اشاریوں میں نمایاں بہتری، زرمبادلہ کے ذخائر میں استحکام اور مالیاتی مضبوطی پر مکمل اعتماد کا اظہار کرتے ہوئے مئی میں کی جانے والی تنزلی کا فیصلہ واپس لے لیا ہے۔ ادارے کی جانب سے پاکستانی بانڈز کی کارکردگی میں مزید بہتری کی پیش گوئی کی گئی ہے، جس سے بین الاقوامی مارکیٹ میں سرمایہ کاروں کے اعتماد میں اضافہ اور ملک کی مجموعی کریڈٹ ریٹنگ بہتر ہونے کی قوی امید ہے۔ بارکلے کا کہنا ہے کہ بین الاقوامی مالیاتی اداروں اور دوست ممالک سے ملنے والی معاونت تک رسائی نے پاکستان میں میکرو اکنامک استحکام لانے میں کلیدی کردار ادا کیا ہے۔ پاکستان کی اس اپ گریڈ شدہ درجہ بندی کی تفصیلات امریکی مالیاتی جریدے ‘بلومبرگ’ کی ایک حالیہ رپورٹ میں شیئر کی گئیں، جس کا حوالہ وزیر خزانہ کے مشیر خرم شہزاد نے سوشل میڈیا پلیٹ فارم ‘ایکس’ (سابقہ ٹوئٹر) پر اپنی ایک پوسٹ کے ذریعے دیا۔