اسرائیل کا جنوبی لبنان سے فوجیں نہ ہٹانے کا اعلان

اسرائیلی وزیر دفاع اسرائیل کاٹز نے دو ٹوک الفاظ میں اعلان کیا ہے کہ اسرائیل جنوبی لبنان سے اپنی فوجیں کسی صورت واپس نہیں بلائے گا، چاہے اس حوالے سے امریکہ کی جانب سے ہی مطالبہ کیوں نہ کیا جائے۔ اپنے ایک بیان میں اسرائیل کاٹز کا کہنا تھا کہ جنوبی لبنان کے خطے میں اسرائیلی فوج کی موجودگی ہر حال میں برقرار رکھی جائے گی اور ماضی جیسی سیکیورٹی صورتحال کو دوبارہ پیدا ہونے کی اجازت بالکل نہیں دی جائے گی۔

اسرائیلی وزیر دفاع نے دعویٰ کیا کہ ماضی میں ان سیکیورٹی زونز کے اندر سڑک کنارے نصب بم دھماکے اور اسرائیلی فوجیوں پر مسلسل حملے ہوتے رہے ہیں، اسی تلخ تجربے کے پیشِ نظر اسرائیل اب وہاں ایسی کمزور صورتحال دوبارہ پیدا نہیں ہونے دے گا۔ انہوں نے مزید کہا کہ اسرائیلی حملوں اور زمینی فوجی کارروائیوں کے باعث لبنان کے سرحدی علاقوں سے بے گھر ہونے والے تقریباً 2 لاکھ لبنانی شہری فی الحال اپنے گھروں کو واپس نہیں آ سکیں گے۔