اسلام آباد مفاہمتی یادداشت کی تمام شقیں ہمارے حق میں ہیں: ایرانی صدر

ایرانی صدر مسعود پزشکیان نے ایک اہم بیان میں تصدیق کی ہے کہ امریکا کے ساتھ جنگ کے خاتمے کے لیے ہونے والے ابتدائی معاہدے کے تحت قطر میں موجود ایران کے 6 ارب ڈالر کے منجمد فنڈز واپس کیے جائیں گے۔

خبر رساں ادارے ‘تسنیم’ کے مطابق، صدر پزشکیان نے موجودہ تزویراتی پیش رفت پر گفتگو کرتے ہوئے کہا کہ اسلام آباد یادداشتِ مفاہمت (MoU) کی تمام شقیں ایران کے حق میں ہیں، اور ان جاری مذاکرات و بات چیت کی کامیابیاں بہت جلد دنیا کے سامنے واضح ہو جائیں گی۔ انہوں نے امریکی قیادت کے بدلے ہوئے رویے کی جانب اشارہ کرتے ہوئے مزید کہا کہ امریکی صدر ڈونلڈ ٹرمپ، جنہوں نے اپنی حالیہ تقریر میں ہمیں کئی کاموں سے روکنے کی بات کی تھی، اب انہی امور کو ایرانی قوم کے جائز حقوق کے طور پر تسلیم کر چکے ہیں۔ صدر نے وثوق سے کہا کہ قطر میں منجمد ہمارے 6 ارب ڈالر ہمیں اب لازمی واپس مل جائیں گے۔

اس موقع پر انہوں نے اسرائیلی وزیراعظم بنیامین نیتن یاہو کو بھی کڑی تنقید کا نشانہ بنایا اور کہا کہ سوئٹزرلینڈ کے شہر برگن اسٹاک میں ہونے والے ان مذاکرات سے اس وقت دنیا میں سب سے زیادہ ناخوش نیتن یاہو ہی ہوں گے۔ ایرانی صدر کے مطابق، امریکہ کا اس وقت واحد مطالبہ یہ ہے کہ ہمارے پاس ایٹمی ہتھیار نہ ہوں، اور یہ بعینہٖ وہی بات ہے جو ہمارے شہید رہبرِ انقلاب بارہا کہتے رہے کہ ہم ایٹمی بم بنانا ہی نہیں چاہتے۔ انہوں نے واضح کیا کہ امریکا نے ہم سے کہا کہ اس بات کو تحریری شکل دیں اور دستخط کریں، اور ہم نے اس پر دستخط کر دیے ہیں۔ صدر مسعود پزشکیان نے یہ بات سابق سپریم لیڈر آیت اللہ علی خامنہ ای کے اس تاریخی مذہبی فتوے کے حوالے سے کہی جس میں ایٹمی ہتھیاروں کی تیاری اور استعمال کی سخت مخالفت کی گئی تھی۔