اسرائیلی فورسز کی لبنان کے ساتھ غزہ میں بھی جنگ بندی کی خلاف ورزیاں جاری

غزہ: اسرائیلی فورسز کی جانب سے غزہ میں جنگ بندی کی مسلسل خلاف ورزیاں جاری ہیں اور نہتے فلسطینیوں کو ایک بار پھر وحشیانہ بمباری کا نشانہ بنایا جا رہا ہے۔ فلسطینی خبر رساں ایجنسی کے مطابق، اسرائیلی فضائیہ نے خان یونس کے المواسی پناہ گزین کیمپ پر حملہ کیا، جس کے نتیجے میں کم از کم 5 فلسطینی شدید زخمی ہو گئے۔ رپورٹ کے مطابق، اکتوبر 2025ء میں ہونے والی جنگ بندی کے بعد سے اب تک اسرائیلی جارحیت کے نتیجے میں 1 ہزار 7 فلسطینی جامِ شہادت نوش کر چکے ہیں، جبکہ 3 ہزار 165 زخمی ہوئے ہیں۔

فلسطینی محکمہ صحت کی جانب سے جاری کردہ تازہ ترین اعدادوشمار کے مطابق، 7 اکتوبر 2023ء سے لے کر اب تک اسرائیلی بربریت کے باعث شہید ہونے والے فلسطینیوں کی مجموعی تعداد 73 ہزار 18 تک پہنچ چکی ہے۔ اس طویل اور خونریز دورانیے میں اسرائیلی فوج کے حملوں اور فضائی بمباری کے نتیجے میں 1 لاکھ 73 ہزار 273 فلسطینی زخمی ہو چکے ہیں، جن میں خواتین اور بچوں کی بڑی تعداد شامل ہے۔ خطے میں سیز فائر کے دعووں کے باوجود اسرائیلی فوج کی پے در پے کارروائیوں نے امن کی کوششوں کو شدید نقصان پہنچایا ہے۔