ایران امریکا معاہدہ: پاکستان سٹاک مارکیٹ میں 4500 سے زائد پوائنٹس کا اضافہ

 ایران اور امریکہ کے درمیان امن معاہدے کے عالمی معیشت پر مثبت اثرات مرتب ہونا شروع ہو گئے ہیں، جس کے باعث پاکستان سٹاک ایکسچینج (PSX) میں زبردست تیزی دیکھنے میں آئی ہے اور کے ایس ای (KSE-100) انڈیکس ایک بار پھر ایک لاکھ 76 ہزار پوائنٹس کی نفسیاتی حد پر بحال ہو گیا ہے۔ کاروباری ہفتے کے پہلے روز آغاز سے ہی انویسٹرز کی جانب سے بھرپور اعتماد کا اظہار کیا گیا، جس کے نتیجے میں مارکیٹ میں 4500 سے زائد پوائنٹس کا ریکارڈ اضافہ ہوا اور ہنڈرڈ انڈیکس 1 لاکھ 76 ہزار 917 پوائنٹس کی بلند سطح پر پہنچ گیا۔ واضح رہے کہ گزشتہ کاروباری ہفتے کے آخری روز مارکیٹ 1 لاکھ 72 ہزار 399 پوائنٹس کی سطح پر بند ہوئی تھی۔

دوسری جانب، اس تزویراتی معاہدے کے بعد نہ صرف پاکستان بلکہ تمام ایشیائی سٹاک مارکیٹس میں بھی تیزی کی شاندار لہر دوڑ گئی ہے۔ بین الاقوامی خبر رساں اداروں کے مطابق، جنوبی کوریا کے ‘کوسپی انڈیکس’ میں 5.27 فیصد اور جاپان کے ‘نکی انڈیکس’ میں 5 فیصد سے زائد کا نمایاں اضافہ ریکارڈ کیا گیا ہے۔ اسی طرح انڈونیشیا کے ‘جکارتہ کمپوزٹ انڈیکس’ میں 2 فیصد، چین کے ‘شنگھائی کمپوزٹ انڈیکس’ میں 1 فیصد کی تیزی جبکہ ہانگ کانگ کے ‘ہینگ سینگ انڈیکس’ میں بھی معمولی اضافہ دیکھا گیا ہے۔ معاشی ماہرین کا ماننا ہے کہ امریکہ اور ایران کے درمیان کشیدگی کے خاتمے سے خطے میں تجارتی سرگرمیاں تیز ہوں گی جس کا براہ راست فائدہ ایشیائی مارکیٹس کو ہو رہا ہے۔