کشمیر ہماری شہ رگ ہے، وہاں کیا ہو رہا ہے؟ راجہ ناصر عباس کا سینیٹ میں سوال

اسلام آباد: قائد حزب اختلاف سینیٹ سینیٹر راجہ ناصر عباس نے کہا کہ کشمیر پاکستان کے لیے شہ رگ کی حیثیت رکھتا ہے اور وہاں کے حالات پر بھی سنجیدگی سے توجہ دینے کی ضرورت ہے۔ ان کا کہنا تھا کہ جب ذرائع ابلاغ پر پابندیاں عائد کی جاتی ہیں تو عوام میں بے چینی اور مختلف قیاس آرائیاں جنم لیتی ہیں۔

قائد حزب اختلاف نے کہا کہ جن لوگوں سے کل مذاکرات کیے جا رہے تھے، آج انہیں غدار قرار دیا جا رہا ہے۔ انہوں نے کرم کی صورتحال کا حوالہ دیتے ہوئے کہا کہ وہاں مسائل بدستور موجود ہیں اور علاقے میں کرفیو نافذ ہے۔

انہوں نے ایوان میں اظہار خیال کرتے ہوئے کہا ہے کہ ووٹ ایک امانت ہے اور اس میں کسی بھی قسم کی ہیرا پھیری خیانت کے مترادف ہے۔

سینیٹ اجلاس کے دوران انہوں نے کہا کہ ایک وقت تھا جب گلگت بلتستان کے عوام میں احساس محرومی شدت اختیار کر چکا تھا، جبکہ آج بھی وہاں کے لوگ اپنے وسائل اور حقوق کے حوالے سے تحفظات کا اظہار کر رہے ہیں۔

تقریر کے دوران ڈپٹی چیئرمین سینیٹ نے مداخلت کرتے ہوئے کہا کہ اگر انتخابات کے نتائج پر اعتراض ہے تو متعلقہ فورم سے رجوع کیا جائے اور انتخابی ٹریبونل میں درخواست دائر کی جائے۔

ڈپٹی چیئرمین کی بار بار مداخلت پر سینیٹر راجہ ناصر عباس نے احتجاجاً ایوان سے واک آؤٹ کر دیا، جس کے بعد پاکستان تحریک انصاف کے ارکان نے بھی ان کے ساتھ ایوان کا بائیکاٹ کرتے ہوئے واک آؤٹ کیا۔