پاکستان اور نائیجیریا کے درمیان اقتصادی و تجارتی تعاون بڑھانے پر اتفاق

پاکستان اور نائیجیریا نے اقتصادی و تجارتی تعاون بڑھانے پر اتفاق کرلیا،ابوجا میں کوآرڈینیٹر برائے کامرس رانا احسان افضل کی نائیجیریا کے وزیرِ خارجہ تُگّر سے اہم ملاقات ہوئی، جس میں دونوں ممالک نے اقتصادی و تجارتی تعلقات مزید فروغ دینے پر اتفاق کر لیا۔

ملاقات میں فیصلہ کیا گیا کہ پاکستان اور نائیجیریا دو طرفہ تجارتی معاہدے کی تکمیل کے عمل کو تیز کریں گے، جبکہ پاکستانی بزنس پرسنز اور سرمایہ کاروں کے لیے نائیجیریا کے ویزا میں مزید آسانیاں فراہم کی جائیں گی۔ اسی طرح پاکستان آنے والے نائیجیرین شہریوں کے لیے بھی ویزا سہولت بڑھانے کا فیصلہ کیا گیا۔وزیراعظم شہباز شریف نے نائیجیریا کے صدر بولا احمد ٹینوبو کو پاکستان کے سرکاری دورے کی باضابطہ دعوت بھی دے دی۔ دونوں ممالک نے توانائی، زراعت، آئی ٹی، فارماسیوٹیکلز اور حلال ٹریڈ میں تعاون کے فروغ پر تفصیلی بات چیت کی۔پاکستان اور نائیجیریا نے عالمی فورمز پر ایک دوسرے کی حمایت جاری رکھنے کے عزم کا اعادہ کیا، جبکہ عوامی روابط کو مزید مضبوط بنانے پر بھی اتفاق کیا گیا۔