انگلینڈ میں 18 سالہ نوجوان کے قتل کیخلاف احتجاج: 11 افسران زخمی، 100 مظاہرین گرفتار

لندن: انگلینڈ میں 18 سالہ سفید فام نوجوان ‘ہنری نواک’ کے قتل کے خلاف دائیں بازو کے حامیوں کے پرتشدد احتجاج اور مظاہروں کا سلسلہ شدت اختیار کر گیا ہے، جس کے دوران اب تک 11 پولیس افسران شدید زخمی جبکہ 100 سے زائد مظاہرین کو گرفتار کیا جا چکا ہے۔

غیر ملکی خبر رساں ایجنسی کے مطابق، ہنری نواک نامی نوجوان چاقو کے حملے میں شدید زخمی ہوا تھا، تاہم پولیس نے اسے طبی امداد فراہم کرنے کے بجائے حراست میں لے لیا تھا۔ اس سنگین غفلت پر ہیمپشائر اور آئل آف وائٹ کی چیف کانسٹیبل ‘الیکسز بون’ نے نوجوان کی گرفتاری کے طریقے پر باقاعدہ عوامی معافی مانگ لی ہے۔

بتایا گیا ہے کہ چاقو کے وار سے لہولہان اور شدید زخمی نواک کو جائے وقوعہ پر پولیس کی جانب سے ہتھکڑیاں لگائی گئی تھیں، جبکہ وہ شدید تکلیف کی حالت میں پولیس اہلکاروں کے سامنے مسلسل یہ دہائی دیتا رہا کہ “اس کا دم نکل رہا ہے”۔ پولیس کے اس رویے کی ویڈیو وائرل ہونے کے بعد ملک بھر میں غم و غصے کی لہر دوڑ گئی اور دائیں بازو کی تنظیموں نے سڑکوں پر نکل کر شدید احتجاج شروع کر دیا۔برطانوی وزیر اعظم کیئر سٹارمر نے ہنری نواک کی گرفتاری اور پولیس سلوک کے اس واقعے کو انتہائی پریشان کن اور افسوسناک قرار دیا ہے۔

وزیراعظم نے اپنے بیان میں کہا”میں نے ہنری نواک کی گرفتاری کی اسکرینز پر آنے والی ویڈیو دیکھی ہے جو کہ انتہائی دہشت ناک اور دل دہلا دینے والی ہے۔ ‘انڈیپنڈنٹ آفس فار پولیس کنڈکٹ’ (IOPC) کو اس پورے معاملے کی فوری اور شفاف تحقیقات کرتے ہوئے تہہ تک جانا چاہیے تاکہ ذمہ داروں کا تعین کیا جا سکے اور انصاف کے تقاضے پورے ہوں۔”

مظاہروں کے باعث مختلف شہروں میں سکیورٹی انتہائی سخت کر دی گئی ہے اور پولیس لائنز کو ہائی الرٹ پر رکھا گیا ہے تاکہ دائیں بازو کے مشتعل مظاہرین اور پولیس کے درمیان مزید تصادم کو روکا جا سکے۔