پاکستان میں کوئی بھی احتساب سے بالاتر نہیں ہے،شاہد خاقان عباسی

عوام پاکستان پارٹی کے سربراہ شاہد خاقان عباسی نے پریس کانفرنس کرتے ہوئے ملکی صورتحال پر گہری تشویش کا اظہار کیا۔ انہوں نے کہا کہ آئی ایم ایف کی رپورٹ میں خاص طور پر امن و امان کا ذکر کیا گیا ہے اور کئی تشویشناک پہلو سامنے آئے ہیں۔ عباسی نے کہا کہ جب تک ملک میں امن قائم نہیں ہوگا، ترقی ممکن نہیں اور آئی ایم ایف کی رپورٹ کو سنجیدگی سے لینا ہوگا۔

انہوں نے ملک میں بڑھتی ہوئی بے روزگاری اور کاروباری شعبے میں حکومت کی مداخلت پر بھی روشنی ڈالی۔ عباسی نے بتایا کہ روزانہ ایک ارب روپے شوگر ملز کے مالکان کی جیب میں جا رہا ہے۔ انہوں نے کہا کہ آئی ایم ایف کے مطابق کرپشن ختم نہ ہونے کی صورت میں ملک میں اقتصادی نمو ممکن نہیں ہوگی، اور موجودہ صورتحال میں کرپشن عروج پر ہے۔

شاہد خاقان عباسی نے کہا کہ پاکستان میں کوئی بھی احتساب سے بالاتر نہیں ہے اور ملکی معاملات چلانا سب کی ذمہ داری ہے۔ انہوں نے زور دیا کہ اصلاحات کے بغیر ملک آگے نہیں بڑھ سکتا اور سب کا احتساب ہونا چاہیے۔ عباسی نے کہا کہ مسلم لیگ ن کی حکومت میں احتساب کے اختیار انہی کے ہاتھ میں ہیں۔

انہوں نے نئی آئینی ترامیم پر بھی تنقید کی اور کہا کہ ان ترامیم میں عوام کے مفاد کی بات نظر نہیں آتی۔ عباسی نے کہا کہ دو تہائی اکثریت سے ترمیم پاس کرنے والے اثرات کا بھی خیال کریں، اور آئین کے لیے جو بھی کام کرے گا، ان کا ساتھ دیں گے۔