98سالہ برطانوی شہری نے فضائی کرتب کا عالمی ریکارڈ اپنے نام کرلیا

دوسری جنگ عظیم میں حصہ لینے والے 98 سالہ برطانوی شہری نے خطرناک فضائی کرتب دکھا کر دنیا کے معمر ترین ونگ واکر کا عالمی ریکارڈ قائم کردیا۔

غیرملکی میڈیا رپورٹس کے مطابق ہیری ہیسمین نے برطانیہ میں ایک پرواز کرتے طیارے کے اوپر کھڑے ہوکر یہ منفرد اعزاز حاصل کیا۔ طیارہ تقریباً ایک ہزار فٹ کی بلندی پر پرواز کر رہا تھا جبکہ معمر شہری نو منٹ تک طیارے کے اوپر کھڑے رہے۔

یہ تاریخی مظاہرہ کیمبرج کے فضائی میدان میں کیا گیا جہاں گنیز ورلڈ ریکارڈ کی ٹیم نے موقع پر موجود رہ کر اس کا مشاہدہ کیا اور بعد ازاں ہیری ہیسمین کو باضابطہ عالمی ریکارڈ کا سرٹیفکیٹ جاری کردیا۔

ہیری ہیسمین کا کہنا تھا کہ وہ بچپن سے اس طرح کا کارنامہ انجام دینے کا خواب دیکھتے تھے اور اب 98 برس کی عمر میں ان کا یہ خواب حقیقت بن گیا۔

انہوں نے بتایا کہ اس خطرناک کرتب کے لیے تقریباً گیارہ ماہ تک جسمانی تربیت حاصل کی تاکہ جسمانی اور ذہنی طور پر خود کو مکمل تیار کرسکیں۔